ଅକ୍ଷର ବ୍ୟୁରୋ: କଲମ୍ବୋ ଟେଷ୍ଟରେ ରୋମାଞ୍ଚକର ମୋଡ଼ । ଭାରତ-ଶ୍ରୀଲଙ୍କା ଦ୍ୱିତୀୟ ଟେଷ୍ଟର ଆଜି ପଞ୍ଚମ ତଥା ଅନ୍ତିମ ଦିନ। ମ୍ୟାଚ୍ରେ ଭାରତ ଏବେ ବିଜୟଠାରୁ ମାତ୍ର କିଛି ୱିକେଟ୍ ଦୂରରେ ଥିବା ବେଳେ, ଫଲୋଅନ୍ ଖେଳୁଥିବା ଶ୍ରୀଲଙ୍କା ଜବରଦସ୍ତ ପ୍ରତିରୋଧ କରି ମ୍ୟାଚ୍କୁ ରୋମାଞ୍ଚକର କରିଦେଇଛି। ଚତୁର୍ଥ ଦିନ ଶେଷରେ ଶ୍ରୀଲଙ୍କା ଦ୍ୱିତୀୟ ପାଳିରେ ୬ ୱିକେଟ୍ ହରାଇ ୨୨୯ ରନ୍ କରିଥିଲା ଏବଂ ଭାରତଠାରୁ ମାତ୍ର ୧୬ ରନ୍ର ଅଗ୍ରଣୀ ନେଇଥିଲା। ପ୍ରଥମେ ବ୍ୟାଟିଂ କରି ଭାରତ ୫୦୩/୯ରେ ପାଳି ଘୋଷଣା କରିଥିଲା। ଦେବଦତ୍ତ ପଡିକଲ ୧୧୭ ରନ୍ର ଶତକୀୟ ପାଳି ଖେଳିଥିବା ବେଳେ ଧ୍ରୁବ ଜୁରେଲ ଅପରାଜିତ ୧୧୫ ରନ୍ କରିଥିଲେ। ଶୁଭମନ ଗିଲ୍ ୫୦ ଏବଂ ଋଷଭ ପନ୍ତ ୬୩ ରନ୍ କରି ଭାରତର ବଡ଼ ସ୍କୋରରେ ଗୁରୁତ୍ୱପୂର୍ଣ୍ଣ ଯୋଗଦାନ କରିଥିଲେ।
ଜବାବରେ ଶ୍ରୀଲଙ୍କାର ପ୍ରଥମ ପାଳି ୨୯୦ ରନ୍ରେ ଶେଷ ହୋଇଥିଲା। ସୋନଲ ଦିନୁଷା ୧୦୩ ରନ୍ର ଶତକୀୟ ପାଳି ଖେଳିଥିଲେ। ଫଳରେ ଭାରତକୁ ୨୧୩ ରନ୍ର ବିଶାଳ ପ୍ରଥମ ପାଳି ଅଗ୍ରଣୀ ମିଳିଥିଲା ଏବଂ ଶ୍ରୀଲଙ୍କାକୁ ଫଲୋଅନ୍ ଖେଳିବାକୁ ପଡ଼ିଥିଲା। ଦ୍ୱିତୀୟ ପାଳିରେ ଶ୍ରୀଲଙ୍କା ଆରମ୍ଭରୁ ଚାପରେ ଥିଲେ ମଧ୍ୟ ପାସିନ୍ଦୁ ସୂରିୟାବନ୍ଦାରା ଓ କାମିନ୍ଦୁ ମେଣ୍ଡିସ୍ ଦଳକୁ ମ୍ୟାଚ୍ରେ ଫେରାଇବାକୁ ଚେଷ୍ଟା କରିଥିଲେ। ସୂରିୟାବନ୍ଦାରା ୯୨ ରନ୍ ଏବଂ ମେଣ୍ଡିସ୍ ୫୫ ରନ୍ କରିଥିଲେ। ତେବେ ଭାରତୀୟ ବୋଲରମାନେ ଶେଷ ସେସନ୍ରେ ଲଗାତାର ୱିକେଟ୍ ନେଇ ଶ୍ରୀଲଙ୍କାର ପ୍ରତିରୋଧକୁ ଧକ୍କା ଦେଇଥିଲେ।
ଏବେ ଅନ୍ତିମ ଦିନରେ ଭାରତକୁ ଶ୍ରୀଲଙ୍କାର ବାକି ୪ ୱିକେଟ୍ ଶୀଘ୍ର ନେବାକୁ ପଡ଼ିବ। ଏହାପରେ ମିଳିବାକୁ ଥିବା ଲକ୍ଷ୍ୟକୁ ଚେଜ୍ କରି ଟିମ୍ ଇଣ୍ଡିଆ ମ୍ୟାଚ୍ ଜିତି ସିରିଜ୍କୁ ୨-୦ରେ କ୍ଲିନ୍ ସୁଇପ୍ କରିବାକୁ ଲକ୍ଷ୍ୟ ରଖିଛି। ତେବେ ବର୍ଷା ମଧ୍ୟ ଅନ୍ତିମ ଦିନର ଖେଳରେ ବଡ଼ ଭୂମିକା ନେଇପାରେ। ପ୍ରଥମ ଟେଷ୍ଟରେ ଭାରତ ୧୬୫ ରନ୍ରେ ବିଜୟୀ ହୋଇଥିବାରୁ ଦୁଇ ଟେଷ୍ଟ ବିଶିଷ୍ଟ ସିରିଜ୍ରେ ଟିମ୍ ଇଣ୍ଡିଆ ୧-୦ରେ ଆଗୁଆ ରହିଛି। ତେଣୁ କଲମ୍ବୋ ଟେଷ୍ଟର ଶେଷ ଦିନ ଭାରତ ପାଇଁ ସିରିଜ୍ ବିଜୟ ଏବଂ ଶ୍ରୀଲଙ୍କା ପାଇଁ ମ୍ୟାଚ୍ ବଞ୍ଚାଇବାର ଶେଷ ସୁଯୋଗ ହୋଇଛି।
Leave a Reply