ଅକ୍ଷର ବ୍ୟୁରୋ: ମୟୂରଭଞ୍ଜ ଜିଲ୍ଲାରୁ ଆସିଛି ଏକ ହୃଦୟବିଦାରକ ଖବର। ରାଇରଙ୍ଗପୁର ଉପଖଣ୍ଡ ଅନ୍ତର୍ଗତ ଗୋରୁମହିଷାଣୀ ଥାନା ଅଞ୍ଚଳର ଗୋରୁଡ଼ପାଣି ଘାଟିରେ ଘଟିଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା। ଘାଟି ରାସ୍ତାରେ ଭାରସାମ୍ୟ ହରାଇ ଏକ ବାଇକ୍ ତଳକୁ ଖସି ପଡ଼ିବାରୁ ଏଥିରେ ସାରଥୀ ସମେତ ୩ ଜଣ ଯୁବକଙ୍କର ଜୀବନ ଚାଲିଯାଇଛି।
ସୂଚନା ଅନୁଯାୟୀ, ଦୁଧିଚୁଆ ଗ୍ରାମର ୩ ଜଣ ଯୁବକ ଗୋରୁଡ଼ପାଣି ଗାଁରୁ ଏକ ବାଇକ୍ରେ ନିଜ ଘରକୁ ଫେରୁଥିଲେ। ତେବେ ଗୋରୁଡ଼ପାଣି ଘାଟି ଦେଇ ଯିବା ବେଳେ ବାଇକ୍ଟି ହଠାତ୍ ଭାରସାମ୍ୟ ହରାଇ ଘାଟି ତଳକୁ ଖସି ପଡ଼ିଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ, ତିନିଜଣ ଯୁବକଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ଘଟଣା ସମ୍ପର୍କରେ ଖବର ପାଇ ଗୋରୁମହିଷାଣୀ ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଦୁର୍ଘଟଣାର କାରଣ ନେଇ ତଦନ୍ତ ଆରମ୍ଭ କରିଛି। ପ୍ରାଥମିକ ଭାବେ ଅତି ଦ୍ରୁତ ଗତି କିମ୍ବା ଘାଟି ରାସ୍ତାରେ ଅସାବଧାନତା ଯୋଗୁଁ ଏହି ଅଘଟଣ ଘଟିଥିବା ସନ୍ଦେହ କରାଯାଉଛି। ଏହି ଦୁଃଖଦ ଘଟଣା ପରେ ଦୁଧିଚୁଆ ଓ ଆଖପାଖ ଅଞ୍ଚଳରେ ଶୋକର ଛାୟା ଖେଳିଯାଇଛି। ଗୋଟିଏ ବାଇକ୍ରେ ୩ ଜଣ ଯାତ୍ରା କରିବା ଏବଂ ବିପଦସଙ୍କୁଳ ଘାଟି ରାସ୍ତାରେ ସତର୍କତା ଅବଲମ୍ବନ ନ କରିବା କିପରି ଭୟଙ୍କର ପରିଣାମ ଆଣିପାରେ, ଏହି ଦୁର୍ଘଟଣା ତାହାର ଏକ କରୁଣ ଉଦାହରଣ ସୃଷ୍ଟି କରିଛି।
Leave a Reply