ଅକ୍ଷର ବ୍ୟୁରୋ: ସମ୍ବଲପୁର–ଝାରସୁଗୁଡ଼ା ବିଜୁ ଏକ୍ସପ୍ରେସୱେରେ ବଡ଼ମାଲ ପୋଲିସ ହାତରେ ଧରାପଡ଼ିଛି ଏକ ବଡ଼ ଗଞ୍ଜେଇ ଚାଲାଣ ଚକ୍ର। ଖେରୁଆଲ ନିକଟରେ ପେଟ୍ରୋଲିଂ ବେଳେ ପୋଲିସ ଏକ ସନ୍ଦିଗ୍ଧ କାର୍କୁ ଅଟକାଇବାକୁ ଚେଷ୍ଟା କରିଥିବାବେଳେ, ଚାଳକ ଖସି ପଳାଇବାକୁ ଯାଇ ଭାରସାମ୍ୟ ହରାଇ କାର୍ଟିକୁ ଡିଭାଇଡରରେ ପିଟି ଦେଇଥିଲା। ଏହାପରେ ଗାଡ଼ି ଯାଞ୍ଚ କରି ପୋଲିସ ବିପୁଳ ପରିମାଣର ଗଞ୍ଜେଇ ଜବତ କରିଛି।
ସୂଚନା ଅନୁଯାୟୀ, ଆଜି ଭୋର ସମୟରେ ବଡ଼ମାଲ ଥାନା ପୋଲିସ ବିଜୁ ଏକ୍ସପ୍ରେସୱେର ଖେରୁଆଲ ଅଞ୍ଚଳରେ ନିୟମିତ ପେଟ୍ରୋଲିଂ କରୁଥିଲା। ସେହି ସମୟରେ ଏକ ସନ୍ଦିଗ୍ଧ କାର୍କୁ ଦେଖି ପୋଲିସ ଅଟକାଇବାକୁ ସଙ୍କେତ ଦେଇଥିଲା। କିନ୍ତୁ ଚାଳକ ପୋଲିସକୁ ଦେଖି ଦ୍ରୁତ ଗତିରେ ଗାଡ଼ି ଚଳାଇ ଖସିବାକୁ ଚେଷ୍ଟା କରିଥିଲେ। ପଳାୟନ ବେଳେ ଭାରସାମ୍ୟ ହରାଇ କାର୍ଟି ଡିଭାଇଡରରେ ପିଟି ହୋଇଯାଇଥିଲା। ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଗାଡ଼ିର ତଲାସି ନେବା ପରେ ସେଥିରୁ ବହୁ ପରିମାଣର ଗଞ୍ଜେଇ ପ୍ୟାକେଟ୍ ଜବତ କରିଥିଲା। ଘଟଣାରେ ଦୁଇ ଜଣ ତସ୍କର ସାମିଲ ଥିବା ବେଳେ ଜଣେ ଅଭିଯୁକ୍ତ ପଳାଇବାରେ ସଫଳ ହୋଇଥିଲେ। ଅନ୍ୟ ଜଣକୁ ପୋଲିସ କାବୁ କରି ଗିରଫ କରିଛି।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଏହି ଗଞ୍ଜେଇ ବୌଦ୍ଧ ଜିଲ୍ଲାରୁ ଛତିଶଗଡ଼ର ରାୟଗଡ଼ ଅଞ୍ଚଳକୁ ଚାଲାଣ କରାଯାଉଥିଲା। ଜବତ ଗଞ୍ଜେଇର ସଠିକ୍ ପରିମାଣ ଜାଣିବା ପାଇଁ ଓଜନ ପ୍ରକ୍ରିୟା ଜାରି ରହିଛି। ଏହି ବେଆଇନ ଚାଲାଣ ପଛରେ ଥିବା ସମ୍ପୂର୍ଣ୍ଣ ରାକେଟ୍କୁ ଠାବ କରିବା ପାଇଁ ବଡ଼ମାଲ ପୋଲିସ ତଦନ୍ତକୁ ଜୋରଦାର କରିଛି। ଫେରାର ଅଭିଯୁକ୍ତଙ୍କୁ ଧରିବା ପାଇଁ ମଧ୍ୟ ଚଢ଼ାଉ ଜାରି ରହିଛି।
Leave a Reply