ଅକ୍ଷର ବ୍ୟୁରୋ: ବୌଦ୍ଧ ଜିଲ୍ଲାର ମନମୁଣ୍ଡା ଥାନା ଅଞ୍ଚଳରେ ଏକ ଚାଞ୍ଚଲ୍ୟକର ହତ୍ୟାକାଣ୍ଡ ଘଟିଛି। ଋଷିବନ୍ଧ ଗାଁର ଯୁବକ କପିଲ ନାଏକଙ୍କୁ ବିଳମ୍ବିତ ରାତିରେ ହତ୍ୟା କରାଯାଇଥିବା ଅଭିଯୋଗ ହୋଇଛି। ଘଟଣା ପରେ ସମଗ୍ର ଅଞ୍ଚଳରେ ଭୟ ଓ ଉତ୍ତେଜନାର ପରିବେଶ ସୃଷ୍ଟି ହୋଇଛି।
ସୂଚନା ଅନୁଯାୟୀ, ମହୁଲି–ଡିଗି ରାସ୍ତା ମୁହାଣ ନିକଟରେ ଥିବା ଏକ ଫାଷ୍ଟଫୁଡ୍ ସେଣ୍ଟର ପରିସରରେ ଏହି ଘଟଣା ଘଟିଛି। ସକାଳେ ସ୍ଥାନୀୟ ଲୋକେ ସେଠାରେ ରକ୍ତାକ୍ତ ଅବସ୍ଥାରେ କପିଲଙ୍କ ମୃତଦେହ ପଡ଼ିଥିବା ଦେଖି ଆତଙ୍କିତ ହୋଇପଡ଼ିଥିଲେ। ପରେ ସେମାନେ ତୁରନ୍ତ ପରିବାର ଲୋକଙ୍କୁ ଓ ପୋଲିସକୁ ଖବର ଦେଇଥିଲେ।
ପରିବାର ଓ ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, କପିଲଙ୍କୁ ଏକ କାଠ ଫାଲିଆ ଓ ବିଅର ବୋତଲ ଭଳି ସାମଗ୍ରୀରେ ଆକ୍ରମଣ କରାଯାଇଥିଲା। ପରବର୍ତ୍ତୀ ସମୟରେ ତାଙ୍କ ଉପରେ ଆଉ ଆକ୍ରମଣ ହୋଇଥିବା ଅଭିଯୋଗ ରହିଛି। ଘଟଣାସ୍ଥଳରେ ହିଁ କପିଲଙ୍କ ମୃତ୍ୟୁ ହୋଇଥିବାବେଳେ ଅଭିଯୁକ୍ତମାନେ ଫେରାର ହୋଇଯାଇଛନ୍ତି। ଖବର ପାଇ ମନମୁଣ୍ଡା ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିଛି। ପୋଲିସ ଘଟଣାସ୍ଥଳରୁ ବିଭିନ୍ନ ପ୍ରମାଣ ସଂଗ୍ରହ କରିବା ସହ ଘଟଣାର ଛାନଭିନ ଆରମ୍ଭ କରିଛି। ହତ୍ୟାର କାରଣ ଏବଂ ଏଥିରେ ସମ୍ପୃକ୍ତ ବ୍ୟକ୍ତିଙ୍କୁ ଚିହ୍ନଟ କରିବା ପାଇଁ ତଦନ୍ତ ଜୋରଦାର କରାଯାଇଛି। ମୃତ କପିଲ ନାଏକ ପରିବାରର ଏକମାତ୍ର ରୋଜଗାରିଆ ସଦସ୍ୟ ଥିବାରୁ ତାଙ୍କ ମୃତ୍ୟୁ ପରିବାର ଉପରେ ବଡ଼ ଆଘାତ ଆଣିଛି। ଘଟଣା ପରେ ଋଷିବନ୍ଧ ଓ ଆଖପାଖ ଅଞ୍ଚଳରେ ଶୋକ ଓ ଆତଙ୍କର ପରିବେଶ ଦେଖାଦେଇଛି।
Leave a Reply