ଅକ୍ଷର ବ୍ୟୁରୋ: ଦୀର୍ଘ ଦିନର ବର୍ଷା ଅଭାବ ପରେ ଶେଷରେ ଚାଷୀଙ୍କ ମୁହଁରେ ଫୁଟିଛି ଆଶାର ହସ। ଗଞ୍ଜାମ ଜିଲ୍ଲାର ଖଲ୍ଲିକୋଟ ଅଞ୍ଚଳରେ ବିଳମ୍ବିତ ରାତିରୁ ଆରମ୍ଭ ହୋଇଥିବା ଝିପ୍ଝିପ୍ ବର୍ଷା ଖରିଫ ଚାଷ ପାଇଁ ନୂଆ ଆଶ୍ୱସ୍ତି ଆଣିଛି। ଆକାଶରୁ ଝରୁଥିବା ପ୍ରତ୍ୟେକ ବର୍ଷା ବୁନ୍ଦା ଏବେ ଚାଷୀଙ୍କ ପାଇଁ ନୂଆ ଭରସାର ବାର୍ତ୍ତା ପାଲଟିଛି। ବର୍ଷା ଅଭାବ ଯୋଗୁଁ ଖଲ୍ଲିକୋଟ ଅଞ୍ଚଳରେ ଧାନ ରୁଆ ଓ ବେଉସା କାମ ପ୍ରାୟ ଅଟକି ଯାଇଥିଲା। କ୍ଷେତରେ ପର୍ଯ୍ୟାପ୍ତ ପାଣି ନଥିବାରୁ ଚାଷୀମାନେ ଗଭୀର ଚିନ୍ତାରେ ଥିଲେ। ଧାନ ଚାଷ ବିଳମ୍ବ ହେବା ସହ ଭଲ ଅମଳକୁ ନେଇ ଆଶଙ୍କା ମଧ୍ୟ ବଢ଼ି ଚାଲିଥିଲା। ହେଲେ ଏବେ ବର୍ଷା ଆରମ୍ଭ ହେବା ପରେ ପୁଣିଥରେ ଚାଷୀମାନେ ଉତ୍ସାହର ସହ କ୍ଷେତମୁହାଁ ହୋଇଛନ୍ତି।
ସକାଳୁ ଚାଷୀମାନେ ଧାନ ରୁଆ ଓ ଅନ୍ୟାନ୍ୟ ଚାଷ କାମ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। କ୍ଷେତରେ ଧୀରେ ଧୀରେ ପାଣି ଜମିବା ଆରମ୍ଭ ହୋଇଥିବାରୁ ଅଟକି ରହିଥିବା ଚାଷ କାମ ପୁଣି ଗତି ଧରିବ ବୋଲି ଆଶା କରୁଛନ୍ତି ଚାଷୀ। ସେପଟେ ପାଣିପାଗ ବିଭାଗ ମଧ୍ୟ ରାଜ୍ୟରେ ଆଗାମୀ ଦିନରେ ବର୍ଷାର ପରିମାଣ ବୃଦ୍ଧି ପାଇବ ବୋଲି ପୂର୍ବାନୁମାନ କରିଛି। ଯଦି ଲଗାତାର ବର୍ଷା ଜାରି ରହେ, ତେବେ ଖରିଫ ଚାଷ ସ୍ୱାଭାବିକ ହେବା ସହ ଧାନ ଉତ୍ପାଦନ ନେଇ ଚାଷୀଙ୍କ ଆଶଙ୍କା ମଧ୍ୟ ଦୂର ହୋଇପାରେ। ଦୀର୍ଘ ଦିନର ଅପେକ୍ଷା ପରେ ଆସିଥିବା ଏହି ବର୍ଷା ଖଲ୍ଲିକୋଟ ଅଞ୍ଚଳର ଚାଷୀଙ୍କ ପାଇଁ କେବଳ ପାଣି ନୁହେଁ, ବରଂ ଖରିଫ ଚାଷକୁ ବଞ୍ଚାଇବାର ନୂଆ ଆଶା, ନୂଆ ଭରସା ଓ ଭଲ ଅମଳର ସ୍ୱପ୍ନ ନେଇ ଆସିଛି।
Leave a Reply