ଅକ୍ଷର ବ୍ୟୁରୋ: ରାଜ୍ୟର ଛାତ୍ରଛାତ୍ରୀଙ୍କ ପାଇଁ ବଡ଼ ଖବର। ଶିକ୍ଷା କ୍ଷେତ୍ରରେ ରାଜ୍ୟ ସରକାର ଆଉ ଏକ ବଡ଼ ପଦକ୍ଷେପ ନେଇଛନ୍ତି। ଏଣିକି ନବମ ଓ ଦଶମ ଶ୍ରେଣୀର ପିଲାଙ୍କୁ ମଧ୍ୟ ମିଳିବ ନିଃଶୁଳ୍କ ପାଠ୍ୟପୁସ୍ତକ। ପୂର୍ବରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ସରକାରଙ୍କ ପକ୍ଷରୁ ମାଗଣା ପାଠ୍ୟପୁସ୍ତକ ଯୋଗାଇ ଦିଆଯାଉଥିଲା। ଏବେ ଏହି ସୁବିଧାକୁ ନବମ ଓ ଦଶମ ଶ୍ରେଣୀ ପର୍ଯ୍ୟନ୍ତ ବଢ଼ାଇ ଦିଆଯାଇଛି।
ଏହାଦ୍ୱାରା ଉଚ୍ଚ ପ୍ରାଥମିକ ଶିକ୍ଷା ପରେ ମାଧ୍ୟମିକ ସ୍ତରରେ ପଢ଼ୁଥିବା ପିଲାମାନେ ମଧ୍ୟ ପାଠ୍ୟପୁସ୍ତକ ପାଇଁ ଅତିରିକ୍ତ ଖର୍ଚ୍ଚରୁ ମୁକ୍ତ ହେବେ। ବିଶେଷକରି ଆର୍ଥିକ ଦୁର୍ବଳ ପରିବାରର ଛାତ୍ରଛାତ୍ରୀଙ୍କ ପାଇଁ ଏହି ନିଷ୍ପତ୍ତି ବେଶ୍ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି। କେବଳ ମାଗଣା ବହି ନୁହେଁ, ନବମ ଓ ଦଶମ ଶ୍ରେଣୀର ଛାତ୍ରଛାତ୍ରୀଙ୍କ ପାଇଁ ପ୍ରଥମ ଥର ମଧ୍ୟାହ୍ନ ଭୋଜନ ବ୍ୟବସ୍ଥା କରାଯାଇଛି। ଫଳରେ ମାଧ୍ୟମିକ ସ୍ତରରେ ପଢ଼ୁଥିବା ପିଲାମାନେ ମଧ୍ୟ ଏହି ସୁବିଧାର ଲାଭ ପାଇପାରିବେ।
ସରକାରଙ୍କ ଏହି ପଦକ୍ଷେପର ଲକ୍ଷ୍ୟ ହେଉଛି ପିଲାମାନଙ୍କୁ ଶିକ୍ଷା ସହ ଯୋଡ଼ି ରଖିବା, ଆର୍ଥିକ କାରଣରୁ ପାଠପଢ଼ାରେ ବାଧା କମାଇବା ଏବଂ ସ୍କୁଲରେ ଛାତ୍ରଛାତ୍ରୀଙ୍କ ଉପସ୍ଥାନ ବଢ଼ାଇବା। ରାଜ୍ୟ ସରକାର ଶିକ୍ଷା କ୍ଷେତ୍ରରେ ‘KGରୁ PG’ ସମ୍ପୂର୍ଣ୍ଣ ମାଗଣା ଶିକ୍ଷା ନେଇ ମଧ୍ୟ ବଡ଼ ନିଷ୍ପତ୍ତି ଘୋଷଣା କରିଛନ୍ତି। ଅର୍ଥାତ୍ ପ୍ରାଥମିକ ଶିକ୍ଷାଠାରୁ ଆରମ୍ଭ କରି ଉଚ୍ଚଶିକ୍ଷା ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ଶିକ୍ଷାର ସୁଯୋଗ ଦେବା ଦିଗରେ ସରକାର ଗୁରୁତ୍ୱ ଦେଇଛନ୍ତି।
ଏହି ପଦକ୍ଷେପ ଲାଗୁ ହେବା ପରେ ରାଜ୍ୟର ଅନେକ ପରିବାର ଏହାର ସିଧାସଳଖ ଲାଭ ପାଇପାରିବେ। ପିଲାଙ୍କ ପାଠ୍ୟପୁସ୍ତକ, ଶିକ୍ଷା ଖର୍ଚ୍ଚ ଏବଂ ସ୍କୁଲରେ ଖାଦ୍ୟ ବ୍ୟବସ୍ଥା ଭଳି ବିଷୟରେ ସରକାରଙ୍କ ପଦକ୍ଷେପ ଅଭିଭାବକଙ୍କ ଉପରୁ ଆର୍ଥିକ ଚାପ କମାଇବାରେ ସହାୟକ ହେବ। ନବମ-ଦଶମ ଶ୍ରେଣୀକୁ ମାଗଣା ପାଠ୍ୟପୁସ୍ତକ ଏବଂ ମଧ୍ୟାହ୍ନ ଭୋଜନ ବ୍ୟବସ୍ଥାରେ ସାମିଲ କରିବା ସହ ‘KGରୁ PG’ ମାଗଣା ଶିକ୍ଷା ଘୋଷଣା ରାଜ୍ୟର ଶିକ୍ଷା ବ୍ୟବସ୍ଥାକୁ ନେଇ ସରକାରଙ୍କ ବଡ଼ ଯୋଜନାକୁ ଦର୍ଶାଉଛି।
Leave a Reply