ଅକ୍ଷର ବ୍ୟୁରୋ: ଆସୁଛି ସ୍ନେହ, ସମ୍ପର୍କ ଓ ଭାଇ-ଭଉଣୀର ପବିତ୍ର ବନ୍ଧନର ପର୍ବ ରକ୍ଷାବନ୍ଧନ। ଏହି ପବିତ୍ର ଦିନରେ ଭଉଣୀ ଭାଇ ହାତରେ ରାକ୍ଷୀ ବାନ୍ଧି ତାଙ୍କର ଦୀର୍ଘାୟୁ ଓ ସୁରକ୍ଷା କାମନା କରିଥାଏ। ହେଲେ ଦେଶର ସୁରକ୍ଷା ପାଇଁ ପରିବାରଠାରୁ ଦୂରେ ରହି ସୀମା ଜଗୁଥିବା ବୀର ଯବାନଙ୍କ ପାଇଁ ଯାଜପୁରର ଛାତ୍ରୀମାନେ ନେଇଛନ୍ତି ଏକ ନିଆରା ପଦକ୍ଷେପ।
ଯାଜପୁର ନରସିଂହ ଚୌଧୁରୀ ସ୍ୱୟଂଶାସିତ ମହାବିଦ୍ୟାଳୟର ବୈତରଣୀ ଛାତ୍ରୀନିବାସର ଛାତ୍ରୀମାନେ ବଜାରରୁ ନିଜ ମନପସନ୍ଦର ରାକ୍ଷୀ କିଣି ଏହାକୁ ଡାକ ଯୋଗେ ସୀମାରେ ମୁତୟନ ଥିବା ଭାରତୀୟ ଯବାନଙ୍କ ପାଖକୁ ପଠାଇଛନ୍ତି। ନିଜ ଭାଇଙ୍କ ହାତରେ ରାକ୍ଷୀ ବାନ୍ଧିବାର ସୁଯୋଗ ସମସ୍ତ ଭଉଣୀଙ୍କୁ ମିଳିନପାରେ। କିନ୍ତୁ ଦେଶକୁ ସୁରକ୍ଷା ଦେଉଥିବା ଯବାନଙ୍କୁ ନିଜର ବଡ଼ଭାଇ ଭାବି ସ୍ନେହର ଏହି ଡୋରି ପଠାଇଛନ୍ତି ଛାତ୍ରୀମାନେ।
କେବଳ ରାକ୍ଷୀ ନୁହେଁ, ଯବାନଙ୍କ ପାଇଁ ସ୍ନେହ, ଶୁଭେଚ୍ଛା ଓ ସମ୍ମାନର ବାର୍ତ୍ତା ମଧ୍ୟ ପଠାଇଛନ୍ତି ଯାଜପୁରର ଏହି ଛାତ୍ରୀମାନେ। ସେମାନଙ୍କ ମନରେ ଗୋଟିଏ ଭାବନା ଯେଉଁମାନେ ଆମକୁ ନିରାପଦରେ ରଖିବା ପାଇଁ ସୀମାରେ ଦିନରାତି ନିଜ କର୍ତ୍ତବ୍ୟ ତୁଲାଉଛନ୍ତି, ସେମାନେ ମଧ୍ୟ ଆମର ଭାଇ। ପରିବାରଠାରୁ ଦୂରରେ ରହି ଦେଶର ସୁରକ୍ଷା ପାଇଁ ନିୟୋଜିତ ଯବାନଙ୍କ ପାଖରେ ରକ୍ଷାବନ୍ଧନର ଏହି ରାକ୍ଷୀ ପହଞ୍ଚିବା ତାଙ୍କ ପ୍ରତି ସମାଜର ସ୍ନେହ ଓ କୃତଜ୍ଞତାର ଏକ ଛୋଟ ପ୍ରତୀକ ବୋଲି କହିଛନ୍ତି ଛାତ୍ରୀମାନେ। ଯାଜପୁରର ଛାତ୍ରୀମାନଙ୍କ ଏହି ନିଆରା ପ୍ରୟାସ ରକ୍ଷାବନ୍ଧନର ଭାବନାକୁ ଏକ ନୂଆ ରୂପ ଦେଇଛି। ରାକ୍ଷୀର ଡୋରିରେ ରହିଛି ସ୍ନେହ, ସମ୍ମାନ, ଭାଇଚାରା ଓ ଦେଶପ୍ରେମ। ନିଜ ପରିବାରର ଭାଇଙ୍କୁ ଦୂରରେ ଥାଇ ମଧ୍ୟ ସ୍ନେହ ଜଣାଇବା ଭଳି, ସୀମାରେ ଦେଶର ପାଇଁ ମୁତୟନ ଥିବା ଯବାନଙ୍କୁ ମଧ୍ୟ ଭାଇର ସମ୍ମାନ ଦେଇଛନ୍ତି ଏହି ଛାତ୍ରୀମାନେ।ଏହି ପଦକ୍ଷେପ କେବଳ ଏକ ପର୍ବ ପାଳନରେ ସୀମିତ ନୁହେଁ। ବରଂ ଦେଶର ସୁରକ୍ଷା ପାଇଁ ନିଜକୁ ସମର୍ପିତ କରିଥିବା ବୀର ଯବାନଙ୍କ ପ୍ରତି ଯୁବପିଢ଼ିର ସମ୍ମାନ ଓ କୃତଜ୍ଞତାର ଏକ ସୁନ୍ଦର ଉଦାହରଣ ପାଲଟିଛି।
Leave a Reply