ସମ୍ବଲପୁର: ମହାନଦୀରେ ବଢ଼ୁଛି ଜଳସ୍ତର। ଛତିଶଗଡ଼ରେ ଅବପାତ ପ୍ରଭାବରେ ଲାଗି ରହିଥିବା ପ୍ରବଳ ବର୍ଷା ଯୋଗୁଁ ମହାନଦୀକୁ ଅଧିକ ଜଳ ପ୍ରବେଶ କରୁଥିବା ବେଳେ ହୀରାକୁଦ ଜଳଭଣ୍ଡାରରୁ ଆଉ ୪ଟି ଗେଟ୍ ଖୋଲାଯାଇଛି। ଆଜି ସକାଳୁ ୪ଟି ଗେଟ୍ ଖୋଲିବା ପରେ ବର୍ତ୍ତମାନ ହୀରାକୁଦର ମୋଟ ୨୪ଟି ଗେଟ୍ ଦେଇ ବନ୍ୟାଜଳ ନିଷ୍କାସିତ ହେଉଛି। ହୀରାକୁଦରୁ ଅଧିକ ଜଳ ନିଷ୍କାସନ ଏବଂ ଛତିଶଗଡ଼ରେ ଜାରି ରହିଥିବା ବର୍ଷା ଯୋଗୁଁ ମହାନଦୀର ତଳମୁଣ୍ଡରେ ବନ୍ୟା ଆଶଙ୍କା ବଢ଼ିଛି। ରାଜସ୍ୱ ମନ୍ତ୍ରୀଙ୍କ ସୂଚନା ଅନୁସାରେ, ଆଜି ମଧ୍ୟରାତ୍ର ସୁଦ୍ଧା ନରାଜରେ ପ୍ରାୟ ୬ ଲକ୍ଷ କ୍ୟୁସେକ୍ ଜଳ ପହଞ୍ଚିପାରେ। ଏତେ ପରିମାଣର ଜଳ ପହଞ୍ଚିଲେ ମହାନଦୀର ତଳମୁଣ୍ଡରେ ଛୋଟ ବନ୍ୟା ଆସିବାର ଆଶଙ୍କା ରହିଛି।
ତେବେ ଛତିଶଗଡ଼ରେ ଏବେ ବି ପ୍ରବଳ ବର୍ଷା ଜାରି ରହିଥିବାରୁ ମହାନଦୀକୁ ଆଗକୁ ଆହୁରି ଅଧିକ ଜଳ ପ୍ରବେଶ କରିବାର ଆଶଙ୍କା ରହିଛି। ଏହା ଫଳରେ ମହାନଦୀର ଜଳସ୍ତର ଆହୁରି ବଢ଼ିପାରେ। ଏହା ସହ ମହାନଦୀର ଉପନଦୀ ତେଲ ଓ ହାତୀ ନଦୀରେ ମଧ୍ୟ ଜଳସ୍ତର ବଢ଼ୁଛି, ଯାହା ତଳମୁଣ୍ଡର ବନ୍ୟା ସ୍ଥିତିକୁ ଆହୁରି ପ୍ରଭାବିତ କରିପାରେ।ସେହିପରି ହୀରାକୁଦରୁ ଜଳ ନିଷ୍କାସନ, ଛତିଶଗଡ଼ର ବର୍ଷା ଏବଂ ମହାନଦୀ ସହ ଏହାର ଉପନଦୀଗୁଡ଼ିକର ବଢ଼ୁଥିବା ଜଳସ୍ତର ଉପରେ ଏବେ ନଜର ରହିଛି। ନରାଜରେ ମଧ୍ୟରାତ୍ର ସୁଦ୍ଧା ପ୍ରାୟ ୬ ଲକ୍ଷ କ୍ୟୁସେକ୍ ଜଳ ପହଞ୍ଚିବାର ଆକଳନ ତଳମୁଣ୍ଡରେ ବନ୍ୟା ସ୍ଥିତି ନେଇ ଚିନ୍ତା ବଢ଼ାଇଛି।
Leave a Reply