ଅକ୍ଷର ବ୍ୟୁରୋ: ଅନୁଗୁଳ–ସମ୍ବଲପୁର ମୁଖ୍ୟ ରାସ୍ତାରେ ଏକ ଭୟଙ୍କର ଅଗ୍ନିକାଣ୍ଡ ଘଟଣା ଘଟି ଅଳ୍ପକେ ଟଳିଗଲା ଏକ ବଡ଼ ଅଘଟଣ। ଅନୁଗୁଳରୁ ସମ୍ବଲପୁର ଅଭିମୁଖେ ଜିଆଇ ତାର ବୋଝେଇ ଯାଉଥିବା ଏକ ଟ୍ରକ୍ ହଠାତ୍ ଚକା ଫାଟିଯିବା ପରେ ନିଆଁରେ ଭସ୍ମ ହୋଇଯାଇଛି। ଧୀରେଧୀରେ ଧୂଆଁ ଉଠିବା ସହ ଅଗ୍ନି ତୀବ୍ର ଭାବେ ବ୍ୟାପି ସମ୍ପୂର୍ଣ୍ଣ ଟ୍ରକ୍କୁ ଘେରି ନେଇଥିଲା।
ସୂଚନା ଅନୁଯାୟୀ, ଚକା ଫାଟିବା ପରେ ଡ୍ରାଇଭର ଓ ହେଲ୍ପର ତୁରନ୍ତ ସତର୍କତା ଅବଲମ୍ବନ କରି ଗାଡ଼ିରୁ ବାହାରି ପଳାଇଯାଇଥିଲେ। ସେମାନଙ୍କ ସମୟୋଚିତ ପଦକ୍ଷେପ ଯୋଗୁଁ ଏକ ଭୟାବହ ଦୁର୍ଘଟଣା ଟଳିଯାଇଥିଲା। ତଥାପି କିଛି ସମୟ ମଧ୍ୟରେ ନିଆଁ ସମ୍ପୂର୍ଣ୍ଣ ଟ୍ରକ୍କୁ କବଳିତ କରିଦେଇଥିଲା ଏବଂ ଗାଡ଼ି ସହିତ ଜିଆଇ ତାର ପୁରାପୁରି ପୋଡ଼ିଯାଇଛି।
ଘଟଣାର ଖବର ପାଇ ଅଗ୍ନିଶମ ବାହିନୀ ଓ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। କଠିନ ପ୍ରୟାସ ପରେ ନିଆଁକୁ ଆୟତ୍ତ କରାଯାଇଥିଲା। ରାସ୍ତା ଉପରେ ନିଆଁ ଲାଗିବାରୁ କିଛି ସମୟ ପାଇଁ ଯାତାୟାତ ବି ଅସ୍ଥିର ହୋଇଯାଇଥିଲା। ପ୍ରାଥମିକ ଭାବେ ଚକା ବିସ୍ଫୋରଣ ହେତୁ ଘର୍ଷଣ ଓ ତାପ ବୃଦ୍ଧି ପାଇ ନିଆଁ ଲାଗିଥିବା ସନ୍ଦେହ କରାଯାଉଛି। ତେବେ ଘଟଣାର ସଠିକ୍ କାରଣ ନେଇ ପୋଲିସ ତଦନ୍ତ ଆରମ୍ଭ କରିଛି।
Leave a Reply