ଅକ୍ଷର ବ୍ୟୁରୋ: ରାଜ୍ୟରେ ୨୦୨୬-୨୭ ଖରିଫ ଋତୁର ଧାନ ସଂଗ୍ରହ ପାଇଁ ଚାଷୀ ପଞ୍ଜିକରଣ ପ୍ରକ୍ରିୟା ଆରମ୍ଭ ହୋଇଛି। ରାଜ୍ୟ ସରକାରଙ୍କ ପକ୍ଷରୁ ଗତକାଲିଠାରୁ ଏହି ପଞ୍ଜିକରଣ ପ୍ରକ୍ରିୟା ଆରମ୍ଭ କରାଯାଇଥିବାବେଳେ ଆସନ୍ତା ଅଗଷ୍ଟ ୩୧ ପର୍ଯ୍ୟନ୍ତ ଏହା ଚାଲିବ। ସରକାରୀ ଧାନ ସଂଗ୍ରହ ବ୍ୟବସ୍ଥାରେ ସାମିଲ ହେବାକୁ ଇଚ୍ଛୁକ ଚାଷୀମାନଙ୍କୁ ଏହି ସମୟ ମଧ୍ୟରେ ପଞ୍ଜିକରଣ କରିବାକୁ କୁହାଯାଇଛି।
ଚାଷୀମାନେ ନିଜ ନିକଟସ୍ଥ ପ୍ରାଥମିକ କୃଷି ସମବାୟ ସମିତି (PACS) କାର୍ଯ୍ୟାଳୟରେ କିମ୍ବା www.foododisha.in ୱେବସାଇଟ୍ ମାଧ୍ୟମରେ ଅନଲାଇନ୍ରେ ପଞ୍ଜିକରଣ କରିପାରିବେ। ପଞ୍ଜିକରଣ ସମୟରେ ଚାଷୀଙ୍କୁ ନିଜର ବ୍ୟକ୍ତିଗତ ସୂଚନା ସହ ଜମି ସମ୍ପର୍କିତ ବିବରଣୀ ଦେବାକୁ ପଡ଼ିବ। ସରକାର ସ୍ପଷ୍ଟ କରିଛନ୍ତି ଯେ, ଗତବର୍ଷ ଯେଉଁ ସମିତିରେ ଚାଷୀ ପଞ୍ଜିକରଣ କରିଥିଲେ, ଚଳିତ ବର୍ଷ ମଧ୍ୟ ସେହି ସମିତିରେ ପଞ୍ଜିକରଣ କରିବାକୁ ହେବ। ଏହାଦ୍ୱାରା ଧାନ କ୍ରୟ ପ୍ରକ୍ରିୟାକୁ ସରଳ ଓ ସ୍ୱଚ୍ଛ କରିବା ସହ ଚାଷୀଙ୍କ ସୁବିଧାକୁ ଗୁରୁତ୍ୱ ଦିଆଯାଇଛି।
ସରକାରଙ୍କ ଯୋଜନା ଅନୁଯାୟୀ, ୨୦୨୬ ନଭେମ୍ବର ୧ରୁ ୨୦୨୭ ମାର୍ଚ୍ଚ ୩୧ ପର୍ଯ୍ୟନ୍ତ ଖରିଫ ଧାନ ସଂଗ୍ରହ କାର୍ଯ୍ୟକ୍ରମ ଚାଲିବ। ଧାନ ଅମଳର ସମୟକୁ ଦୃଷ୍ଟିରେ ରଖି ବିଭିନ୍ନ ଜିଲ୍ଲାରେ ପର୍ଯ୍ୟାୟକ୍ରମେ ଜିଲ୍ଲାୱାରୀ ଧାନ କ୍ରୟ କରାଯିବ। ଖାଦ୍ୟ ଯୋଗାଣ ବ୍ୟବସ୍ଥାକୁ ସୁଦୃଢ଼ କରିବା ସହ ଚାଷୀମାନଙ୍କୁ ନିର୍ଦ୍ଧାରିତ ସମୟରେ ଧାନ ବିକ୍ରିର ସୁଯୋଗ ଯୋଗାଇବା ପାଇଁ ସରକାର ଏହି ପଞ୍ଜିକରଣ ପ୍ରକ୍ରିୟାକୁ ସମୟାନୁବର୍ତ୍ତୀ ଭାବେ ସମ୍ପୂର୍ଣ୍ଣ କରିବାକୁ ଅନୁରୋଧ କରିଛନ୍ତି। ଯେଉଁ ଚାଷୀମାନେ ଏପର୍ଯ୍ୟନ୍ତ ପଞ୍ଜିକରଣ କରିନାହାନ୍ତି, ସେମାନେ ଶେଷ ତାରିଖ ପୂର୍ବରୁ ନିଶ୍ଚିତ ଭାବେ ପଞ୍ଜିକରଣ କରିବାକୁ ପରାମର୍ଶ ଦିଆଯାଇଛି।
Leave a Reply