ଅକ୍ଷର ବ୍ୟୁରୋ: କୋରାପୁଟ ଜିଲ୍ଲାର ବୈପାରିଗୁଡ଼ା ବ୍ଲକରେ ବିଲୁଆ ଆତଙ୍କ ଚରମ ସୀମାରେ ପହଞ୍ଚିଛି। ଗାଁ ଭିତରକୁ ପଶି ଏକ ବିଲୁଆ ଗୋଟିଏ ପରେ ଗୋଟିଏ ଲୋକଙ୍କୁ ଆକ୍ରମଣ କରିବାରୁ ୬ ଜଣ ଗୁରୁତର ଆହତ ହୋଇଛନ୍ତି। ଏହି ଘଟଣା ପରେ ସମଗ୍ର ଅଞ୍ଚଳରେ ଆତଙ୍କ ଖେଳିଯାଇଥିବା ବେଳେ ବନ ବିଭାଗ ବିଲୁଆକୁ ଧରିବା ପାଇଁ ସଜାଗ ହୋଇପଡ଼ିଛି।
ସୂଚନା ଅନୁଯାୟୀ, ବିଲୁଆଟି ହଠାତ୍ ଲୋକବସତି ମଧ୍ୟକୁ ପଶି ଆକ୍ରମଣ ଆରମ୍ଭ କରିଥିଲା। ଏଥିରେ ଖୋରାଗୁଡ଼ା ଗ୍ରାମର ୪ ଜଣ, କଦମଗୁଡ଼ା ଗ୍ରାମର ଜଣେ ଏବଂ ବଡ଼ାଗୁଡ଼ା ଗ୍ରାମର ଜଣେ ମିଶି ମୋଟ ୬ ଜଣ ଆହତ ହୋଇଛନ୍ତି। ଆକ୍ରମଣରେ ଆହତମାନଙ୍କ ମଧ୍ୟରେ ଭୟ ଓ ଆତଙ୍କ ସୃଷ୍ଟି ହୋଇଥିବା ବେଳେ ସ୍ଥାନୀୟ ଲୋକେ ତୁରନ୍ତ ସେମାନଙ୍କୁ ଉଦ୍ଧାର କରିଥିଲେ। ଆହତ ସମସ୍ତଙ୍କୁ ବୈପାରିଗୁଡ଼ା ମେଡିକାଲକୁ ନେଇ ଭର୍ତ୍ତି କରାଯାଇଛି। ସେଠାରେ ଡାକ୍ତରୀ ଟିମ୍ ସେମାନଙ୍କର ଚିକିତ୍ସା କରୁଥିବା ବେଳେ ସ୍ୱାସ୍ଥ୍ୟାବସ୍ଥା ଉପରେ କଡ଼ା ନଜର ରଖିଛନ୍ତି। ଆକ୍ରମଣ ଘଟଣା ପରେ ଗ୍ରାମବାସୀଙ୍କ ମଧ୍ୟରେ ଭୟର ପରିବେଶ ଦେଖାଦେଇଛି ଏବଂ ଅନେକ ଲୋକ ଘରୁ ବାହାରିବାକୁ ମଧ୍ୟ ଭୟ କରୁଛନ୍ତି।
ଘଟଣାର ସୂଚନା ପାଇ ବନ ବିଭାଗର ଟିମ୍ ଘଟଣାସ୍ଥଳରେ ପହଞ୍ଚି ବିଲୁଆକୁ ଠାବ କରିବା ଏବଂ ସୁରକ୍ଷିତ ଭାବେ କାବୁ କରିବା ପାଇଁ ଅଭିଯାନ ଆରମ୍ଭ କରିଛି। ଏଥିସହ ସ୍ଥାନୀୟ ଲୋକଙ୍କୁ ସତର୍କ ରହିବା, ଏକୁଟିଆ ବାହାରକୁ ନଯିବା ଓ ବନ୍ୟଜନ୍ତୁ ଦେଖିଲେ ତୁରନ୍ତ ବନ ବିଭାଗକୁ ଖବର ଦେବାକୁ ପରାମର୍ଶ ଦିଆଯାଇଛି। ଲଗାତାର ବନ୍ୟଜନ୍ତୁଙ୍କ ଲୋକବସତି ମୁହାଁ ହେବା ଏବଂ ମଣିଷଙ୍କ ଉପରେ ଆକ୍ରମଣ ଘଟଣା ବଢ଼ୁଥିବାରୁ ଅଞ୍ଚଳବାସୀଙ୍କ ମଧ୍ୟରେ ଚିନ୍ତା ବଢ଼ିଛି। ବନ ବିଭାଗ କେତେ ଶୀଘ୍ର ବିଲୁଆକୁ କାବୁ କରୁଛି ଏବଂ ଭବିଷ୍ୟତରେ ଏଭଳି ଘଟଣା ରୋକିବା ପାଇଁ କି ପଦକ୍ଷେପ ନେଉଛି, ତାହା ଉପରେ ସମସ୍ତଙ୍କ ନଜର ରହିଛି।
Leave a Reply