ଅକ୍ଷର ବ୍ୟୁରୋ: କେନ୍ଦୁଝର ଜିଲ୍ଲାରେ ପୁଣି ଦେଖାଦେଇଛି ଦନ୍ତା ଆତଙ୍କ। ଶୁଆକାଟୀ OMC ଖଣି ବାଇପାସ୍ ରାସ୍ତା ଓ ଆଖପାଖ ଅଞ୍ଚଳରେ ଏକ ଦନ୍ତା ହାତୀର ଲଗାତାର ଚଳପ୍ରଚଳ ଯୋଗୁଁ ସ୍ଥାନୀୟ ଲୋକ ଓ ପଥଚାରୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ବିଶେଷକରି ଶୁଆକାଟୀ ପାଟେଶ୍ୱର କଲେଜ ନିକଟରେ ଦୀର୍ଘ ସମୟ ଧରି ହାତୀଟି ବୁଲାବୁଲି କରୁଥିବାରୁ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି।
ସୂଚନା ଅନୁସାରେ, କେନ୍ଦୁଝରରୁ ବାଂଶପାଳ ବ୍ଲକକୁ ସଂଯୋଗ କରୁଥିବା ମୁଖ୍ୟ ରାସ୍ତା ନିକଟରେ ଦୀର୍ଘ ଦିନ ହେଲା ହାତୀ ଚଳପ୍ରଚଳ କରୁଛି। ସେଥିମଧ୍ୟରୁ ଏକ ଦନ୍ତା ଅଧିକାଂଶ ସମୟରେ ରାସ୍ତା ପାର୍ ହେଉଥିବା ଦେଖିବାକୁ ମିଳୁଛି। କେତେବେଳେ ହାତୀଟି ରାସ୍ତା କଡ଼ରେ ଦୀର୍ଘ ସମୟ ଧରି ଠିଆ ହୋଇ ରହୁଥିବାରୁ ଯାତାୟାତ କରୁଥିବା ଲୋକଙ୍କ ମଧ୍ୟରେ ଭୟ ବଢ଼ିଯାଇଛି। ଦନ୍ତାର ଉପଦ୍ରବକୁ ଦୃଷ୍ଟିରେ ରଖି ବନ ବିଭାଗର କର୍ମଚାରୀମାନେ ଘଟଣାସ୍ଥଳରେ ଡେରା ପକାଇଛନ୍ତି। ହାତୀଟିର ଗତିବିଧି ଉପରେ ନିରନ୍ତର ନଜର ରଖାଯାଉଥିବାବେଳେ ଏହାକୁ ପୁଣି ଜଙ୍ଗଲ ଅଞ୍ଚଳକୁ ଫେରାଇ ନେବା ପାଇଁ ଉଦ୍ୟମ ଚାଲିଛି।
ହାତୀର ଚଳପ୍ରଚଳ ଯୋଗୁଁ ଆଖପାଖ ଗ୍ରାମଗୁଡ଼ିକରେ ଭୟର ପରିବେଶ ଦେଖାଦେଇଛି। ଏପରି ସ୍ଥିତିରେ ବନ ବିଭାଗ ପକ୍ଷରୁ ଲୋକମାନଙ୍କୁ ସତର୍କ ରହିବା, ହାତୀ ନିକଟକୁ ନଯିବା ଏବଂ ରାତି ସମୟରେ ଅନାବଶ୍ୟକ ଭାବେ ବାହାରକୁ ନଯିବାକୁ ପରାମର୍ଶ ଦିଆଯାଇଛି। ଦନ୍ତା ହାତୀର ଏଭଳି ମୁକ୍ତ ଚଳପ୍ରଚଳ କେବଳ ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି କରୁନାହିଁ, ବରଂ ଯାତାୟାତ ବ୍ୟବସ୍ଥାକୁ ମଧ୍ୟ ପ୍ରଭାବିତ କରୁଛି। ତେଣୁ ହାତୀଟିକୁ ଶୀଘ୍ର ଜଙ୍ଗଲକୁ ଫେରାଇ ନେବା ପାଇଁ ବନ ବିଭାଗର ପ୍ରୟାସ ଜୋରଦାର ହୋଇଛି।
Leave a Reply