ଅକ୍ଷର ବ୍ୟୁରୋ: ନୂଆପଡ଼ା ଜିଲ୍ଲାରେ ଏକ ହୃଦୟବିଦାରକ ଅଘଟଣ ସାମ୍ନାକୁ ଆସିଛି। କେମନା ଥାନା ଅନ୍ତର୍ଗତ ଭେଲା ଛତ୍ରିଆପଡ଼ା ଗାଁରେ କରେଣ୍ଟ ଲାଗି ଜଣେ ୨ ବର୍ଷର ଶିଶୁପୁତ୍ରର ମୃତ୍ୟୁ ହୋଇଛି। ଏହି ଦୁଃଖଦ ଘଟଣା ପରେ ପରିବାର ସହ ସମଗ୍ର ଗାଁରେ ଶୋକର ପରିବେଶ ସୃଷ୍ଟି ହୋଇଛି।
ସୂଚନା ଅନୁଯାୟୀ, ଶିଶୁଟି ଘର ଭିତରେ ଖେଳୁଥିବା ସମୟରେ ଅସାବଧାନତାବଶତଃ ଘରେ ପଡ଼ିଥିବା ଏକ ବିଦ୍ୟୁତ ତାରକୁ ସ୍ପର୍ଶ କରିଥିଲା। ଏହାଫଳରେ ତୀବ୍ର ବିଦ୍ୟୁତ ଆଘାତ ଲାଗି ଶିଶୁଟି ଗୁରୁତର ଆହତ ହୋଇପଡ଼ିଥିଲା। ପରିବାର ଲୋକେ ତୁରନ୍ତ ଶିଶୁଟିକୁ ଉଦ୍ଧାର କରି ନିକଟସ୍ଥ ହସ୍ପିଟାଲକୁ ନେଇଥିଲେ। ତେବେ ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ଏହି ଖବର ପ୍ରଚାର ହେବା ପରେ ଗାଁରେ ଶୋକର ଛାୟା ଖେଳିଯାଇଛି।
ଘଟଣା ପରେ ସ୍ଥାନୀୟ ଲୋକମାନେ ଘରୋଇ ବିଦ୍ୟୁତ ସଂଯୋଗ ଓ ଖୋଲା ବିଦ୍ୟୁତ ତାରର ସୁରକ୍ଷା ବ୍ୟବସ୍ଥାକୁ ନେଇ ଗଭୀର ଉଦ୍ବେଗ ପ୍ରକାଶ କରିଛନ୍ତି। ଏଭଳି ଅବହେଳା ଯୋଗୁଁ ନିରୀହ ଶିଶୁର ଜୀବନ ଚାଲିଯାଇଥିବାରୁ ଭବିଷ୍ୟତରେ ଏପରି ଦୁର୍ଘଟଣା ଏଡ଼ାଇବା ପାଇଁ ବିଦ୍ୟୁତ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବାକୁ ଦାବି ଉଠିଛି। ଏହି ଘଟଣା ପୁଣିଥରେ ସଚେତନ କରିଦେଇଛି ଯେ, ଘରେ ଛୋଟ ଶିଶୁ ଥିଲେ ବିଦ୍ୟୁତ ତାର ଓ ବିଦ୍ୟୁତ ଉପକରଣର ସୁରକ୍ଷା ପ୍ରତି ବିଶେଷ ସତର୍କତା ଅବଲମ୍ବନ କରିବା କେତେ ଜରୁରୀ।
Leave a Reply