ଅକ୍ଷର ବ୍ୟୁରୋ: ବିଶ୍ୱର ବିଭିନ୍ନ ଦେଶରେ ପ୍ରାକୃତିକ ବିପର୍ଯ୍ୟୟର ପ୍ରକୋପ ଜାରି ରହିଥିବା ବେଳେ ଶନିବାର ସକାଳେ ପାକିସ୍ତାନରେ ଏକ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ରିକ୍ଟର ସ୍କେଲରେ ଏହାର ତୀବ୍ରତା ୫.୪ ରେକର୍ଡ କରାଯାଇଥିବା ବେଳେ, ହଠାତ୍ ଭୂକମ୍ପ ଝଟକାରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା। ଭୟଭୀତ ଲୋକେ ଘର ଛାଡ଼ି ରାସ୍ତାକୁ ଦୌଡ଼ି ଆସିଥିବା ଦେଖିବାକୁ ମିଳିଛି।
ଭୂକମ୍ପ ଗବେଷଣା କେନ୍ଦ୍ର ଏବଂ ଭୂକମ୍ପ ନିରୀକ୍ଷଣ ସଂସ୍ଥାଗୁଡ଼ିକର ସୂଚନା ଅନୁଯାୟୀ, ଏହି ଭୂମିକମ୍ପ ଶନିବାର ସକାଳ ପ୍ରାୟ ୮ଟା ୫୩ ମିନିଟ ସମୟରେ ଅନୁଭୂତ ହୋଇଥିଲା। ଏହାର ପ୍ରଭାବ କେତେକ ଅଞ୍ଚଳରେ ସ୍ପଷ୍ଟ ଭାବେ ଅନୁଭୂତ ହୋଇଥିବାରୁ ଲୋକମାନଙ୍କ ମଧ୍ୟରେ କିଛି ସମୟ ପାଇଁ ଆତଙ୍କ ସୃଷ୍ଟି ହୋଇଥିଲା। ୟୁରୋପୀୟ ଭୂମଧ୍ୟସାଗରୀୟ ଭୂକମ୍ପ ବିଜ୍ଞାନ କେନ୍ଦ୍ର (EMSC) ଅନୁସାରେ, ଭୂମିକମ୍ପର ଉତ୍ପତ୍ତିସ୍ଥଳ ଭୂପୃଷ୍ଠର ପ୍ରାୟ ୩୫ କିଲୋମିଟର ଗଭୀରରେ ଥିଲା। ସେହିପରି, ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ପକ୍ଷରୁ ମିଳିଥିବା ସୂଚନା ଅନୁଯାୟୀ, ଭୂମିକମ୍ପର କେନ୍ଦ୍ରସ୍ଥଳ ପାକିସ୍ତାନ ଅଞ୍ଚଳରେ ଭୂପୃଷ୍ଠର ୪୦ରୁ ୭୫ କିଲୋମିଟର ତଳେ ଅବସ୍ଥିତ ଥିଲା।
ତେବେ ସବୁଠାରୁ ଆଶ୍ୱସ୍ତିକର କଥା ହେଉଛି, ଏହି ଭୂମିକମ୍ପ ଯୋଗୁଁ ଏପର୍ଯ୍ୟନ୍ତ କୌଣସି ଜୀବନହାନି କିମ୍ବା ବଡ଼ ଧରଣର କ୍ଷୟକ୍ଷତି ହୋଇଥିବାର ସୂଚନା ମିଳିନାହିଁ। ତଥାପି ପ୍ରଶାସନ ପରିସ୍ଥିତି ଉପରେ କଡ଼ା ନଜର ରଖିଥିବା ବେଳେ ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି। ପାକିସ୍ତାନ ଭଳି ଭୂକମ୍ପ ପ୍ରବଣ ଅଞ୍ଚଳରେ ବାରମ୍ବାର ଏପରି ଭୂମିକମ୍ପ ଘଟଣା ଚିନ୍ତା ବଢ଼ାଉଥିବା ବେଳେ, ନିକଟ ଅତୀତରେ ବିଶ୍ୱର ବିଭିନ୍ନ ଦେଶରେ ଘଟୁଥିବା ପ୍ରାକୃତିକ ବିପର୍ଯ୍ୟୟ ପୁଣିଥରେ ବିଶ୍ୱ ସମୁଦାୟକୁ ସତର୍କ କରିଦେଇଛି।
Leave a Reply