ଅକ୍ଷର ବ୍ୟୁରୋ: ଅବପାତ ପ୍ରଭାବରେ ସମ୍ବଲପୁର ସହରରେ ଲଗାଣ ମୂଷଳଧାରା ବର୍ଷା ଜନଜୀବନକୁ ସମ୍ପୂର୍ଣ୍ଣ ଅସ୍ତବ୍ୟସ୍ତ କରିଦେଇଛି। ସକାଳଠାରୁ ଅବିରତ ବର୍ଷା ଜାରି ରହିବାରୁ ସହରର ଅଧିକାଂଶ ରାସ୍ତାଘାଟ ଜଳମଗ୍ନ ହୋଇପଡ଼ିଛି। ଅନେକ ସ୍ଥାନରେ ଆଣ୍ଠୁଏ ଉଚ୍ଚର ପାଣି ଜମିଥିବାରୁ ଯାତାୟାତ ବ୍ୟବସ୍ଥା ଗୁରୁତର ଭାବେ ପ୍ରଭାବିତ ହୋଇଛି ଏବଂ ସାଧାରଣ ଲୋକଙ୍କୁ ନାହିଁନଥିବା ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି।
ପ୍ରବଳ ବର୍ଷାର ସବୁଠାରୁ ଅଧିକ ପ୍ରଭାବ ଅଇଁଠାପାଲି ପିଏଚ୍ଡି ପଡ଼ିଆରେ ଚାଲିଥିବା ମୀନାବଜାର ଉପରେ ପଡ଼ିଛି। ସମ୍ପୂର୍ଣ୍ଣ ପଡ଼ିଆ ଆଣ୍ଠୁଏ ଉଚ୍ଚର ପାଣିରେ ବୁଡ଼ିଯାଇଥିବାରୁ ବ୍ୟବସାୟୀଙ୍କ ବ୍ୟବସାୟ ଠପ୍ ହୋଇପଡ଼ିଛି। ସେହିପରି ମୀନାବଜାରକୁ ଆସିଥିବା ଦର୍ଶନାର୍ଥୀମାନେ ମଧ୍ୟ ନାନା ସମସ୍ୟାର ସମ୍ମୁଖୀନ ହୋଇଛନ୍ତି। ସହରର ବିଭିନ୍ନ ପ୍ରମୁଖ ରାସ୍ତାରେ ବର୍ଷା ପାଣିର ସୁଅ ଛୁଟୁଥିବା ବେଳେ ଅନେକ ସ୍ଥାନରେ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଛି। ନିମ୍ନାଞ୍ଚଳରେ ପାଣି ଜମି ରହିଥିବାରୁ ଦୁଇଚକିଆ ଓ ଚାରିଚକିଆ ଯାନ ଚଳାଚଳରେ ବେଶ୍ ସମସ୍ୟା ସୃଷ୍ଟି ହୋଇଛି।
କେବଳ ରାସ୍ତାଘାଟ ନୁହେଁ, ସହରର ବିଭିନ୍ନ କଲୋନୀରେ ବର୍ଷା ପାଣି ଘର ଭିତରକୁ ପଶିଯାଇଥିବାରୁ ଅନେକ ପରିବାର ଜଳବନ୍ଦୀ ଭଳି ପରିସ୍ଥିତିରେ ରହିଛନ୍ତି। ଘରୋଇ ସାମଗ୍ରୀ ନଷ୍ଟ ହେବା ସହ ଦୈନନ୍ଦିନ ଜୀବନ ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି। ଅବପାତ ପ୍ରଭାବରେ ବର୍ଷା ଜାରି ରହିଥିବାରୁ ପ୍ରଶାସନ ପରିସ୍ଥିତି ଉପରେ କଡ଼ା ନଜର ରଖିଛି। ନିମ୍ନାଞ୍ଚଳ ଅଞ୍ଚଳଗୁଡ଼ିକର ସ୍ଥିତି ଉପରେ ନଜରଦାରି କରାଯାଉଥିବାବେଳେ, ଅତ୍ୟାବଶ୍ୟକ କାମ ନଥିଲେ ଘରୁ ବାହାରକୁ ନ ଆସିବା ଏବଂ ଜଳମଗ୍ନ ରାସ୍ତାରେ ଯାତାୟାତ ନ କରିବାକୁ ସାଧାରଣ ଲୋକଙ୍କୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି। ଆଗାମୀ କିଛି ଘଣ୍ଟା ଯାଏଁ ବର୍ଷା ଜାରି ରହିବାର ସମ୍ଭାବନା ଥିବାରୁ ସମ୍ବଲପୁରବାସୀଙ୍କ ଚିନ୍ତା ଆହୁରି ବଢ଼ିଛି।
Leave a Reply