ଅକ୍ଷର ବ୍ୟୁରୋ: ହୀରାକୁଦ ଡ୍ୟାମକୁ ନେଇ ଆସିଛି ବଡ଼ ଅପଡେଟ୍। ଉପରମୁଣ୍ଡରେ ବର୍ଷାର ପ୍ରଭାବ କମିବା ସହ ଡ୍ୟାମକୁ ଆସୁଥିବା ଜଳପ୍ରବାହ (ଇନଫ୍ଲୋ) ହ୍ରାସ ପାଉଥିବାରୁ କର୍ତ୍ତୃପକ୍ଷ ଆଉ ଗୋଟିଏ ସ୍ଲୁଇସ୍ ଗେଟ୍ ବନ୍ଦ କରିଛନ୍ତି। ଫଳରେ ବର୍ତ୍ତମାନ ହୀରାକୁଦ ଡ୍ୟାମର କେବଳ ୨ଟି ଗେଟ୍ ଦେଇ ମହାନଦୀକୁ ବନ୍ୟାଜଳ ନିଷ୍କାସନ କରାଯାଉଛି।
ଲଗାଣ ବର୍ଷା ଏବଂ ଉପରମୁଣ୍ଡରୁ ଆସୁଥିବା ବିପୁଳ ଜଳପ୍ରବାହ ଯୋଗୁଁ କିଛିଦିନ ଧରି ଡ୍ୟାମର ଏକାଧିକ ଗେଟ୍ ଖୋଲା ରଖାଯାଇଥିଲା। ତେବେ ବର୍ତ୍ତମାନ ବର୍ଷାର ପରିମାଣ କମିବା ସହ ଜଳପ୍ରବାହ ମଧ୍ୟ ଧୀରେ ଧୀରେ ହ୍ରାସ ପାଉଥିବାରୁ ଡ୍ୟାମର ସ୍ଥିତିରେ ସୁଧାର ଦେଖିବାକୁ ମିଳିଛି। ଏହାକୁ ଦୃଷ୍ଟିରେ ରଖି ଜଳସମ୍ପଦ ବିଭାଗ ପର୍ଯ୍ୟାୟକ୍ରମେ ଗେଟ୍ ବନ୍ଦ କରିବା ଆରମ୍ଭ କରିଛି।
ସର୍ବଶେଷ ସୂଚନା ଅନୁସାରେ, ହୀରାକୁଦ ଡ୍ୟାମର ଜଳସ୍ତର ୬୧୧.୨୧ ଫୁଟ୍ ରହିଛି। ଜଳସ୍ତର ସୁରକ୍ଷିତ ସୀମା ମଧ୍ୟରେ ଥିବାରୁ ଆତଙ୍କର କୌଣସି କାରଣ ନଥିବା ବେଳେ ପରିସ୍ଥିତି ଉପରେ ଜଳସମ୍ପଦ ବିଭାଗ ନିରନ୍ତର ନଜର ରଖିଛି।
ବିଶେଷଜ୍ଞଙ୍କ ମତରେ, ଉପରମୁଣ୍ଡରେ ବର୍ଷା ଆହୁରି କମିଲେ ଏବଂ ଡ୍ୟାମକୁ ଆସୁଥିବା ଜଳପ୍ରବାହ ହ୍ରାସ ପାଇଲେ, ଆଗାମୀ ଦିନରେ ଜଳସ୍ତର ଆହୁରି କମିବ। ଏପରି ସ୍ଥିତିରେ ଅବଶିଷ୍ଟ ୨ଟି ଗେଟ୍ ମଧ୍ୟ ପର୍ଯ୍ୟାୟକ୍ରମେ ବନ୍ଦ କରାଯାଇପାରେ। ହୀରାକୁଦ ଡ୍ୟାମର ଜଳସ୍ଥିତିରେ ସୁଧାର ଆସିବା ପରେ ତଳିଆ ଅଞ୍ଚଳର ଲୋକଙ୍କ ପାଇଁ ଏହା ଏକ ବଡ଼ ଆଶ୍ୱସ୍ତିର ଖବର। ତଥାପି ପାଣିପାଗର ପରିବର୍ତ୍ତନକୁ ଦୃଷ୍ଟିରେ ରଖି ଜଳସମ୍ପଦ ବିଭାଗ ସତର୍କତାର ସହ ପରିସ୍ଥିତି ଉପରେ ନଜର ରଖିଛି।
Leave a Reply