ଅକ୍ଷର ବ୍ୟୁରୋ: ଦେଶର ସବୁଠୁ ପ୍ରତିଷ୍ଠିତ ଓ ଐତିହାସିକ ହୋଟେଲ ମଧ୍ୟରୁ ଅନ୍ୟତମ ମୁମ୍ବାଇର ତାଜ୍ ମହଲ ପ୍ୟାଲେସ୍ ହୋଟେଲକୁ ବୋମା ମାଡ଼ କରି ଉଡ଼ାଇ ଦେବାକୁ ଧମକ ମିଳିବା ପରେ ସମଗ୍ର ମୁମ୍ବାଇରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଧମକପୂର୍ଣ୍ଣ ଫୋନ୍ କଲ୍ ପରେ ମୁମ୍ବାଇ ପୋଲିସ, ବୋମା ନିଷ୍କାସନ ସ୍କ୍ୱାଡ୍ ଓ ସ୍ନିଫର୍ ଡଗ୍ ସ୍କ୍ୱାଡ୍ ତୁରନ୍ତ ସକ୍ରିୟ ହୋଇ ହୋଟେଲ ପରିସରରେ ବ୍ୟାପକ ସର୍ଚ୍ଚ ଅପରେସନ ଚଳାଇଛନ୍ତି।
ସୂଚନା ଅନୁସାରେ, ଶନିବାର ବିଳମ୍ବିତ ରାତି ପ୍ରାୟ ୧୨ଟା ସମୟରେ ନଭି ମୁମ୍ବାଇ ପୋଲିସ କଣ୍ଟ୍ରୋଲ ରୁମକୁ ଏକ ଅଜଣା ନମ୍ବରରୁ ଫୋନ୍ କଲ୍ ଆସିଥିଲା। ଫୋନ୍ କରିଥିବା ବ୍ୟକ୍ତି ମୁମ୍ବାଇର ପ୍ରସିଦ୍ଧ ତାଜ୍ ମହଲ ପ୍ୟାଲେସ୍ ହୋଟେଲକୁ ବୋମା ମାଡ଼ କରି ଉଡ଼ାଇ ଦେବାକୁ ଧମକ ଦେଇଥିଲେ।
ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ନଭି ମୁମ୍ବାଇ ପୋଲିସ ତୁରନ୍ତ ସୂଚନାକୁ ମୁମ୍ବାଇ ପୋଲିସକୁ ହସ୍ତାନ୍ତର କରିଥିଲା। ଏହାପରେ ମୁମ୍ବାଇ ପୋଲିସ ତୁରନ୍ତ ସକ୍ରିୟ ହୋଇ ବୋମା ନିଷ୍କାସନ ସ୍କ୍ୱାଡ୍, ସ୍ନିଫର୍ ଡଗ୍ ଏବଂ ସୁରକ୍ଷା କର୍ମୀଙ୍କ ସହଯୋଗରେ ସମଗ୍ର ହୋଟେଲ ପରିସରରେ ବ୍ୟାପକ ତଲାସି ଅଭିଯାନ ଆରମ୍ଭ କରିଥିଲେ। ହୋଟେଲର ସୁରକ୍ଷା ବ୍ୟବସ୍ଥାକୁ ମଧ୍ୟ ଅଧିକ କଡ଼ାକଡ଼ି କରାଯାଇଛି। ଧମକପୂର୍ଣ୍ଣ ଫୋନ୍ କଲ୍ କେଉଁଠୁ ଆସିଥିଲା ଏବଂ କିଏ କରିଥିଲା, ସେନେଇ ପୋଲିସ ଖୋଳତାଳ ଜାରି ରଖିଛି। ପ୍ରାଥମିକ ତଦନ୍ତରେ ଏହା ହୋକ୍ସ କଲ୍ (ଭୁଆ ଧମକ) ହୋଇପାରେ ବୋଲି ସନ୍ଦେହ କରାଯାଉଥିଲେ ମଧ୍ୟ, ସୁରକ୍ଷା ଦୃଷ୍ଟିରୁ ପୋଲିସ କୌଣସି ପ୍ରକାର ଅବହେଳା କରିନାହିଁ।
ଉଲ୍ଲେଖଯୋଗ୍ୟ ଯେ, ୨୦୦୮ ମସିହାର ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣରେ ତାଜ୍ ମହଲ ପ୍ୟାଲେସ୍ ହୋଟେଲ୍ ମୁଖ୍ୟ ଟାର୍ଗେଟ୍ ଥିଲା। ସେହି ଘଟଣା ପରଠାରୁ ଏହି ହୋଟେଲକୁ ନେଇ ଆସୁଥିବା ଯେକୌଣସି ଧମକକୁ ସୁରକ୍ଷା ଏଜେନ୍ସି ଅତ୍ୟନ୍ତ ସମ୍ବେଦନଶୀଳ ଭାବରେ ନେଇଥାନ୍ତି। ବର୍ତ୍ତମାନ ହୋଟେଲ ପରିସ୍ଥିତି ସ୍ୱାଭାବିକ ରହିଥିବା ବେଳେ ସମଗ୍ର ଅଞ୍ଚଳରେ ସୁରକ୍ଷା କର୍ମୀଙ୍କୁ ହାଇ ଆଲର୍ଟରେ ରଖାଯାଇଛି। ପୋଲିସ ଧମକପୂର୍ଣ୍ଣ କଲ୍ର ଉତ୍ସ ଚିହ୍ନଟ କରିବା ସହ ଘଟଣାର ସମସ୍ତ ଦିଗକୁ ନେଇ ତଦନ୍ତ ଜାରି ରଖିଛି।
Leave a Reply