ଅକ୍ଷର ବ୍ୟୁରୋ: ଲଗାଣ ବର୍ଷାରେ ଧସିଗଲା ନିର୍ମାଣାଧୀନ ନୂଆ ରାସ୍ତା। ରାସ୍ତା ଧସିବା ପରେ ନିୟନ୍ତ୍ରଣ ହରାଇ ରାସ୍ତାକଡ଼କୁ ଓଲଟିପଡ଼ିଲା ଦୁଇଟି ଟ୍ରକ୍। କେନ୍ଦ୍ରାପଡ଼ା NH-୫୩ର ମାର୍ଶାଘାଇ ନୀଳାଚଳ ବଜାର ନିକଟରେ ଘଟିଛି ଏହି ଅଘଟଣ। ସୂଚନା ଅନୁସାରେ, NH-୫୩ରେ ବର୍ତ୍ତମାନ ରାସ୍ତା ନିର୍ମାଣ କାମ ଚାଲିଛି। ଲଗାଣ ବର୍ଷା ମଧ୍ୟରେ ନିର୍ମାଣାଧୀନ ନୂଆ ରାସ୍ତାର ଏକ ବଡ଼ ଅଂଶ ହଠାତ୍ ଧସିଯାଇଥିଲା। ଫଳରେ ରାସ୍ତା ଉପରେ ଯାଉଥିବା ଦୁଇଟି ଟ୍ରକ୍ ଭାରସାମ୍ୟ ହରାଇ ରାସ୍ତାକଡ଼ ଜମି ଭିତରକୁ ଖସି ଓଲଟିପଡ଼ିଥିଲା।
ଘଟଣାସ୍ଥଳର ଦୃଶ୍ୟରୁ ରାସ୍ତାର ଏକ ବଡ଼ ଅଂଶ ମାଟି ସହ ଧସିଯାଇଥିବା ଜଣାପଡ଼ୁଛି। ଏହି ଘଟଣା ପରେ ରାଜପଥରେ ଯାତାୟାତକୁ ନେଇ ଆଶଙ୍କା ବଢ଼ିଛି। ଲଗାଣ ବର୍ଷା ମଧ୍ୟରେ ନିର୍ମାଣାଧୀନ ରାସ୍ତା ଧସିଯିବା ଘଟଣା ରାସ୍ତା ନିର୍ମାଣର ମାନ ଓ ସୁରକ୍ଷା ବ୍ୟବସ୍ଥା ଉପରେ ମଧ୍ୟ ପ୍ରଶ୍ନ ଉଠାଇଛି। ତେବେ ରାସ୍ତା ଧସିବାର ପ୍ରକୃତ କାରଣ କ’ଣ, ନିର୍ମାଣ କାମରେ କୌଣସି ତ୍ରୁଟି ରହିଛି କି ନାହିଁ ଏବଂ ଘଟଣାରେ କେତେ କ୍ଷୟକ୍ଷତି ହୋଇଛି, ତାହା ତଦନ୍ତ ପରେ ସ୍ପଷ୍ଟ ହେବ। ବର୍ଷା ଜାରି ରହିଥିବାରୁ ଧସିଥିବା ଅଞ୍ଚଳରେ ଆହୁରି ମାଟି ଧସିବାର ଆଶଙ୍କା ଥିବାରୁ ଯାତାୟାତ ସମୟରେ ସତର୍କତା ଜରୁରୀ।
Leave a Reply