ନାଗାଲାଣ୍ଡ: ନାଗାଲାଣ୍ଡରେ ସନ୍ଦିଗ୍ଧ ନକଲି ମଦ ପିଇ ୧୯ ଜଣଙ୍କ ମୃତ୍ୟୁ ଘଟଣାକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ମାତ୍ର ଦୁଇ ଦିନ ମଧ୍ୟରେ ମୋକୋକଚୁଙ୍ଗ ଓ ତୁଏନସାଙ୍ଗ ଜିଲ୍ଲାରେ ଏହି ମୃତ୍ୟୁ ଘଟିଥିବା ପୁଲିସ ସୂଚନା ଦେଇଛି। ଘଟଣାର ଗମ୍ଭୀରତାକୁ ଦେଖି ମୃତ୍ୟୁର କାରଣ, ସନ୍ଦିଗ୍ଧ ମଦର ଉତ୍ସ ଏବଂ ଏହାର ଯୋଗାଣ ଚେନ୍ର ତଦନ୍ତ ପାଇଁ ସ୍ୱତନ୍ତ୍ର ତଦନ୍ତକାରୀ ଟିମ୍ (SIT) ଗଠନ କରାଯାଇଛି। ପୁଲିସର ସୂଚନା ଅନୁସାରେ, ମୋକୋକଚୁଙ୍ଗ ଜିଲ୍ଲାରେ ୮ ଜଣ ଏବଂ ତୁଏନସାଙ୍ଗ ଜିଲ୍ଲାରେ ୧୧ ଜଣଙ୍କ ମୃତ୍ୟୁ ହୋଇଛି। ଅର୍ଥାତ୍ ଦୁଇ ଦିନରେ ମୋଟ ୧୯ ଜଣ ଜୀବନ ହରାଇଛନ୍ତି। ତେବେ ମୃତ୍ୟୁର ପ୍ରକୃତ କାରଣ ଫୋରେନସିକ୍ ପରୀକ୍ଷା ରିପୋର୍ଟ ଆସିବା ପରେ ସ୍ପଷ୍ଟ ହେବ।
ଘଟଣାର ତଦନ୍ତ ପାଇଁ ଅତିରିକ୍ତ ଏସ୍ପି ଆଇ ବୁଙ୍ଗଲାଙ୍ଗ ଚାଙ୍ଗଙ୍କ ନେତୃତ୍ୱରେ SIT ଗଠନ କରାଯାଇଛି। ଏହି ଟିମ୍ ମୃତ୍ୟୁର କାରଣ ଖୋଜିବା ସହ ସନ୍ଦିଗ୍ଧ ମଦ କେଉଁଠାରୁ ଆସିଥିଲା ଏବଂ କିପରି ଲୋକଙ୍କ ପାଖରେ ପହଞ୍ଚିଥିଲା, ତାହାର ତଦନ୍ତ କରିବ। ଘଟଣାସ୍ଥଳରୁ ସଂଗ୍ରହ କରାଯାଇଥିବା ମଦର ନମୁନାକୁ ଫୋରେନସିକ୍ ପରୀକ୍ଷା ପାଇଁ ଗୁଆହାଟୀ ପଠାଯାଇଛି। ଫୋରେନସିକ୍ ରିପୋର୍ଟ ମିଳିବା ପରେ ମଦରେ କୌଣସି ବିଷାକ୍ତ ପଦାର୍ଥ ଥିଲା କି ନାହିଁ ଏବଂ ମୃତ୍ୟୁ ସହ ଏହାର ସମ୍ପର୍କ କ’ଣ, ସେନେଇ ଅଧିକ ସ୍ପଷ୍ଟତା ମିଳିବ। ଘଟଣା ପରେ ପୁଲିସ ବିଭିନ୍ନ ସ୍ଥାନରେ ଚଢ଼ାଉ କରି ୧୯ ଜଣଙ୍କୁ ଗିରଫ କରିଛି। ଚଢ଼ାଉ ବେଳେ ପ୍ରାୟ ୩ ହଜାର ବୋତଲ ମଦ ମଧ୍ୟ ଜବତ କରାଯାଇଛି। ତଦନ୍ତକାରୀ ଟିମ୍ ଏହି ମଦର ଉତ୍ସ ଓ ଯୋଗାଣ ନେଟୱର୍କ ସମ୍ପର୍କରେ ତଥ୍ୟ ସଂଗ୍ରହ କରୁଛି।
ଉଲ୍ଲେଖଯୋଗ୍ୟ, ନାଗାଲାଣ୍ଡରେ ୧୯୯୦ ମସିହାରୁ ମଦ ନିଷେଧ ଆଇନ ଲାଗୁ ରହିଛି। ଏହାସତ୍ତ୍ୱେ ସନ୍ଦିଗ୍ଧ ଅବୈଧ ମଦ ଯୋଗୁଁ ଏଭଳି ମୃତ୍ୟୁ ଘଟଣା ସାମ୍ନାକୁ ଆସିବା ପରେ ଅବୈଧ ମଦ କାରବାରକୁ ନେଇ ପ୍ରଶ୍ନ ଉଠିଛି। ପୁଲିସ ପକ୍ଷରୁ ଲୋକଙ୍କୁ ଅଜଣା, ଲେବଲ୍ ନଥିବା କିମ୍ବା ସନ୍ଦିଗ୍ଧ ମଦ ନପିଇବାକୁ ସତର୍କ କରାଯାଇଛି। ଏପରି କୌଣସି ମଦ ସେବନ ପରେ ମୁଣ୍ଡ ବୁଲାଇବା, ଦୃଷ୍ଟି ଧୁସର ହେବା, ଶ୍ୱାସକଷ୍ଟ କିମ୍ବା ଚେତା ହରାଇବା ଭଳି ଲକ୍ଷଣ ଦେଖାଦେଲେ ତୁରନ୍ତ ଡାକ୍ତରୀ ସହାୟତା ନେବାକୁ ପୁଲିସ ପରାମର୍ଶ ଦେଇଛି।
Leave a Reply