କେନ୍ଦୁଝର: ଘରେ ବଡ଼ ଗ୍ୟାସ୍ ସିଲିଣ୍ଡରରୁ ଛୋଟ ସିଲିଣ୍ଡରକୁ ଗ୍ୟାସ୍ ଭରୁଥିବା ବେଳେ ଘଟିଲା ଭୟଙ୍କର ଅଘଟଣ। ଗ୍ୟାସ୍ ଲିକ୍ ହୋଇ ଅଗ୍ନିକାଣ୍ଡ ଘଟିବାରୁ ୩ ଶିଶୁଙ୍କ ସହ ସେମାନଙ୍କ ବାପା ଗୁରୁତର ଭାବେ ପୋଡ଼ି ଯାଇଛନ୍ତି। ଏଭଳି ଅଭାବନୀୟ ଘଟଣା କେନ୍ଦୁଝର ଜିଲ୍ଲା ବଲାଣିର ବାକରାଢ଼ିପା ହଟିଂରେ ଘଟିଛି। ଆହତମାନେ ହେଲେ ଗୁପଚୁପ ବ୍ୟବସାୟୀ ଦୀପକ କୁମାର ସିଂହ ଏବଂ ତାଙ୍କର ତିନି ସନ୍ତାନ। ଅଗ୍ନିକାଣ୍ଡ ପରେ ସ୍ଥାନୀୟ ଲୋକେ ତୁରନ୍ତ ପଦକ୍ଷେପ ନେଇ ନିଆଁକୁ ଆୟତ୍ତ କରିବା ସହ ଚାରିଜଣଙ୍କୁ ଉଦ୍ଧାର କରିଥିଲେ। ପ୍ରଥମେ ସେମାନଙ୍କୁ ସେଲ୍ ବଲାଣି ଡାକ୍ତରଖାନାକୁ ନିଆଯାଇଥିଲା। ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ସମସ୍ତଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ସୂଚନା ଅନୁଯାୟୀ, ଗୁପଚୁପ ବ୍ୟବସାୟ କରୁଥିବା ଦୀପକ କୁମାର ସିଂହ ନିଜ ଘରେ ଏକ ବଡ଼ ଗ୍ୟାସ୍ ସିଲିଣ୍ଡରରୁ ଛୋଟ ସିଲିଣ୍ଡରକୁ ଗ୍ୟାସ୍ ଭରୁଥିଲେ। ଏହି ସମୟରେ ହଠାତ୍ ଗ୍ୟାସ୍ ଲିକ୍ ହୋଇ ନିଆଁ ଲାଗିଯାଇଥିଲା। ଚାହୁଁ ଚାହୁଁ ନିଆଁ ସମଗ୍ର କୋଠରୀକୁ ବ୍ୟାପି ଯାଇଥିଲା। ଘଟଣା ସମୟରେ ଘରେ ଉପସ୍ଥିତ ଥିବା ଦୀପକ ଓ ତାଙ୍କର ତିନି ସନ୍ତାନ ନିଆଁରେ ପୋଡ଼ି ଗୁରୁତର ଆହତ ହୋଇଥିଲେ। ହଠାତ୍ ଅଗ୍ନିକାଣ୍ଡ ଘଟିବାରୁ ସେଠାରେ ଆତଙ୍କ ଖେଳିଯାଇଥିଲା। ଅଗ୍ନିକାଣ୍ଡ ସମ୍ପର୍କରେ ଜଣାପଡ଼ିବା ପରେ ସ୍ଥାନୀୟ ଲୋକେ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ସେମାନଙ୍କ ତ୍ୱରିତ ପଦକ୍ଷେପ ଯୋଗୁଁ ନିଆଁକୁ ଆୟତ୍ତ କରାଯାଇଥିଲା। ଏହାସହ ଗୁରୁତର ଅବସ୍ଥାରେ ଥିବା ଦୀପକ ଓ ତାଙ୍କର ତିନି ସନ୍ତାନଙ୍କୁ ଉଦ୍ଧାର କରାଯାଇଥିଲା।
ପରେ ଚାରିଜଣଙ୍କୁ ଚିକିତ୍ସା ପାଇଁ ସେଲ୍ ବଲାଣି ଡାକ୍ତରଖାନାକୁ ନିଆଯାଇଥିଲା। ସେଠାରେ ପ୍ରାଥମିକ ଚିକିତ୍ସା ପରେ ସେମାନଙ୍କ ଅବସ୍ଥା ଗୁରୁତର ଥିବାରୁ ଅଧିକ ଚିକିତ୍ସା ପାଇଁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି। ଘରେ ଗୋଟିଏ ସିଲିଣ୍ଡରରୁ ଅନ୍ୟ ସିଲିଣ୍ଡରକୁ ନିଜେ ଗ୍ୟାସ୍ ଭରିବା ଅତ୍ୟନ୍ତ ବିପଜ୍ଜନକ। ଏପରି କାର୍ଯ୍ୟରେ ଗ୍ୟାସ୍ ଲିକ୍ ହେଲେ ଅଗ୍ନିକାଣ୍ଡ ଓ ଗୁରୁତର ଦୁର୍ଘଟଣା ଘଟିପାରେ। ବଲାଣିର ଏହି ଘଟଣା ପୁଣିଥରେ ଗ୍ୟାସ୍ ସିଲିଣ୍ଡର ବ୍ୟବହାର ସମୟରେ ସୁରକ୍ଷା ନିୟମ ମାନିବାର ଗୁରୁତ୍ୱକୁ ସାମ୍ନାକୁ ଆଣିଛି। ତେବେ ଏହି ଅଗ୍ନିକାଣ୍ଡରେ ଆହତ ହୋଇଥିବା ବାପା ଓ ତିନି ଶିଶୁଙ୍କ ସ୍ୱାସ୍ଥ୍ୟାବସ୍ଥା ଉପରେ ଏବେ ସମସ୍ତଙ୍କ ନଜର ରହିଛି।
Leave a Reply