ଭୁବନେଶ୍ୱର: ରାଜଧାନୀରେ ରାତି ଅଧରେ ଆତଙ୍କରାଜ! ଜଣେ ଯୁବତୀଙ୍କ ଘରେ ପଶି କିଛି ଯୁବକ ସଂଘବଦ୍ଧ ଆକ୍ରମଣ କରିଥିବା ଅଭିଯୋଗ ହୋଇଛି। ଯୁବତୀଙ୍କୁ ଆକ୍ରମଣ କରାଯାଉଥିବା ବେଳେ ତାଙ୍କ ମାଆ ଓ ବାପା ପ୍ରତିବାଦ କରିବାରୁ ଦୁର୍ବୃତ୍ତମାନେ ସେମାନଙ୍କୁ ଖଣ୍ଡାରେ ଆକ୍ରମଣ କରିଥିବା ଅଭିଯୋଗ ଉଠିଛି। ଏଥିରେ ଆହତ ହୋଇଥିବା ଦମ୍ପତିଙ୍କୁ ଚିକିତ୍ସା ପାଇଁ ମେଡିକାଲରେ ଭର୍ତ୍ତି କରାଯାଇଛି। ସହିଦନଗର ଥାନା ଅଞ୍ଚଳର ବାୟା ବାବା ବସ୍ତିରେ ଘଟିଥିବା ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର୍ ଧରିଛି।
ସୂଚନା ଅନୁଯାୟୀ, ଗତକାଲି ରାତିରେ କିଛି ଯୁବକ ହଠାତ୍ ବାୟା ବାବା ବସ୍ତିରେ ଥିବା ଜଣେ ଯୁବତୀଙ୍କ ଘରେ ପଶିଥିଲେ। ଏହାପରେ ସେମାନେ ଘର ଭିତରେ ଯୁବତୀଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି। ଏଭଳି ଆକ୍ରମଣକୁ ଯୁବତୀଙ୍କ ମାଆ ଓ ବାପା ବିରୋଧ କରିଥିଲେ। ଯୁବତୀଙ୍କୁ ଆକ୍ରମଣରୁ ରକ୍ଷା କରିବାକୁ ଯାଇ ତାଙ୍କ ମାଆ ଓ ବାପା ଦୁର୍ବୃତ୍ତଙ୍କୁ ପ୍ରତିବାଦ କରିଥିଲେ। ଅଭିଯୋଗ ଅନୁସାରେ, ଏହାପରେ ଆକ୍ରମଣକାରୀମାନେ ଖଣ୍ଡାରେ ଉଭୟଙ୍କୁ ଆକ୍ରମଣ କରିଥିଲେ। ଖଣ୍ଡା ଚୋଟରେ ଆହତ ହୋଇଥିବା ଦମ୍ପତିଙ୍କୁ ତୁରନ୍ତ ମେଡିକାଲକୁ ନିଆଯାଇଥିଲା। ରାତି ଅଧରେ ଘରେ ପଶି ଏଭଳି ସଂଘବଦ୍ଧ ଆକ୍ରମଣ ଘଟଣା ସ୍ଥାନୀୟ ଲୋକଙ୍କ ମଧ୍ୟରେ ଭୟ ସୃଷ୍ଟି କରିଛି। ତେବେ ଆକ୍ରମଣ ପଛରେ କାରଣ କ’ଣ, କେତେ ଜଣ ଏଥିରେ ସାମିଲ ଥିଲେ ଏବଂ ଅଭିଯୁକ୍ତମାନେ କିଏ, ସେନେଇ ସବିଶେଷ ତଥ୍ୟ ଏଯାଏଁ ସାମ୍ନାକୁ ଆସିନାହିଁ। ଘଟଣା ସମ୍ପର୍କରେ ପୋଲିସର ପରବର୍ତ୍ତୀ ପଦକ୍ଷେପ ଓ ତଦନ୍ତର ତଥ୍ୟ ଆସିବା ପରେ ଅଧିକ ସୂଚନା ସ୍ପଷ୍ଟ ହେବ।
Leave a Reply