ଅକ୍ଷର ବ୍ୟୁରୋ: ରାତି ପାହିଲେ ପବିତ୍ର ଦେବସ୍ନାନ ପୂର୍ଣ୍ଣିମା । ବର୍ଷକୁ ଥରେ ଆୟୋଜିତ ହେଉଥିବା ଏହି ମହାନ ଧାର୍ମିକ ପର୍ବ ପାଇଁ ଶ୍ରୀକ୍ଷେତ୍ର ସମ୍ପୂର୍ଣ୍ଣ ପ୍ରସ୍ତୁତ ହୋଇପଡ଼ିଛି। ଶ୍ରୀଜଗନ୍ନାଥ, ବଡ଼ଭାଇ ବଳଭଦ୍ର ଓ ଭଉଣୀ ସୁଭଦ୍ରାଙ୍କ ଦେବସ୍ନାନ ନୀତି ଏବଂ ପରବର୍ତ୍ତୀ ହାତୀବେଶ ଦର୍ଶନ ପାଇଁ ଲକ୍ଷାଧିକ ଭକ୍ତଙ୍କ ସମାଗମ ହେବାର ସମ୍ଭାବନା ଥିବାରୁ ଶ୍ରୀମନ୍ଦିର ପ୍ରଶାସନ, ପୁଲିସ ଓ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।
ସୂଚନା ଅନୁସାରେ, ଭୋର ୫ଟାରୁ ୭ଟା ମଧ୍ୟରେ ଶ୍ରୀଜିଉଙ୍କ ପହଣ୍ଡି ବିଜେ ସମ୍ପନ୍ନ ହେବ। ଏହା ପରେ ସ୍ନାନବେଦୀରେ ଦିନଭରି ବିଭିନ୍ନ ପାରମ୍ପରିକ ନୀତିକାନ୍ତି ଅନୁଷ୍ଠିତ ହେବ। ଅପରାହ୍ନ ୪ଟାରୁ ଶ୍ରୀଜିଉଙ୍କ ପ୍ରସିଦ୍ଧ ହାତୀବେଶ ଅନୁଷ୍ଠିତ ହେବାକୁ ସମୟ ନିର୍ଦ୍ଧାରଣ କରାଯାଇଛି। ମହାପ୍ରଭୁଙ୍କ ଏହି ଦିବ୍ୟ ବେଶ ଦର୍ଶନ ପାଇଁ ଦେଶର ବିଭିନ୍ନ ପ୍ରାନ୍ତରୁ ଭକ୍ତମାନେ ପୁରୀରେ ପହଞ୍ଚିବା ଆରମ୍ଭ କରିଛନ୍ତି। ଦେବସ୍ନାନ ପୂର୍ଣ୍ଣିମା ନୀତିକୁ ସୁଚାରୁ ଭାବେ ସମ୍ପନ୍ନ କରିବା ଏବଂ ସୁରକ୍ଷା ବ୍ୟବସ୍ଥାକୁ ଦୃଢ଼ କରିବା ପାଇଁ ଆଜି ଦିନ ୧ଟା ପର୍ଯ୍ୟନ୍ତ ସର୍ବସାଧାରଣଙ୍କ ଦର୍ଶନ ବନ୍ଦ ରଖାଯାଇଛି। ଏହା ସହିତ ପୁରୀ ସହରରେ ଭାରୀ ଯାନ ଚଳାଚଳ ଉପରେ ଅସ୍ଥାୟୀ କଟକଣା ଜାରି କରାଯାଇଥିବା ବେଳେ ଟ୍ରାଫିକ ପରିଚାଳନା ପାଇଁ ସ୍ୱତନ୍ତ୍ର ଯୋଜନା କାର୍ଯ୍ୟକାରୀ କରାଯାଇଛି।
ଭକ୍ତଙ୍କ ସୁରକ୍ଷା, ସୁବିଧା ଓ ଭିଡ଼ ପରିଚାଳନାକୁ ପ୍ରାଥମିକତା ଦେଇ ପୁରୀ ପୁଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ମନ୍ଦିର ପରିସର, ବଡ଼ଦାଣ୍ଡ, ସ୍ନାନବେଦୀ ଏବଂ ପ୍ରମୁଖ ସ୍ଥାନଗୁଡ଼ିକରେ ସୁରକ୍ଷାକର୍ମୀ ମୁତୟନ କରାଯାଇଛନ୍ତି। ଦେବସ୍ନାନ ପୂର୍ଣ୍ଣିମା କେବଳ ଶ୍ରୀମନ୍ଦିରର ଏକ ପ୍ରମୁଖ ନୀତି ନୁହେଁ, ବରଂ ରଥଯାତ୍ରା ପର୍ବର ଆନୁଷ୍ଠାନିକ ଆରମ୍ଭ ଭାବେ ମଧ୍ୟ ପରିଗଣିତ। ତେଣୁ ଏହି ଦିବ୍ୟ ମହୋତ୍ସବକୁ ନେଇ ସମଗ୍ର ପୁରୀ ଏବେ ଭକ୍ତି, ଆଧ୍ୟାତ୍ମିକତା ଓ ଉତ୍ସବର ପରିବେଶରେ ଉତ୍ସବମୁଖର ହୋଇଉଠିଛି।
Leave a Reply