ଅକ୍ଷର ବ୍ୟୁରୋ: ଲୋହିତ ସାଗରରେ ପୁଣି ଥରେ ସାମୁଦ୍ରିକ ସୁରକ୍ଷାକୁ ନେଇ ବଡ଼ ଚିନ୍ତା ସୃଷ୍ଟି ହୋଇଛି। ୟେମେନର ପଶ୍ଚିମ ଉପକୂଳ ନିକଟରେ ଭାରତୀୟ ପତାକା ବିଶିଷ୍ଟ ଜାହାଜ MSV ‘ଫଇଜ୍ ନୁରେ ଓଲିୟା’ ଉପରେ ଭୟଙ୍କର ଆକ୍ରମଣ ହୋଇଥିବା ବେଳେ ଜାହାଜଟି ସମୁଦ୍ରରେ ବୁଡ଼ିଯାଇଛି। ତେବେ ସବୁଠାରୁ ବଡ଼ ଆଶ୍ୱସ୍ତିର କଥା ହେଉଛି, ଜାହାଜରେ ଥିବା ୧୩ ଜଣ ଭାରତୀୟଙ୍କ ସମେତ ସମସ୍ତ ୧୪ ଜଣ କ୍ରୁ ସଦସ୍ୟଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।
ସୂଚନା ଅନୁସାରେ, ୟେମେନର ପଶ୍ଚିମ ଉପକୂଳ ସଂଲଗ୍ନ ଲୋହିତ ସାଗରରେ ଯାତ୍ରା କରୁଥିବା ସମୟରେ ଜାହାଜଟି ଆକ୍ରମଣର ଶିକାର ହୋଇଥିଲା। ଆକ୍ରମଣ ପରେ ଜାହାଜଟି ଓଲଟି ପଡ଼ି ସମୁଦ୍ରରେ ବୁଡ଼ିଯାଇଥିଲା। ଏଥିରେ ଥିବା ୧୩ ଜଣ ଭାରତୀୟ ନାବିକ ଓ ଜଣେ ୟେମେନୀ ନାଗରିକଙ୍କୁ ୟେମେନ ସରକାରୀ ସେନା ଏବଂ କୋଷ୍ଟ ଗାର୍ଡ ମିଳିତ ଭାବେ ଉଦ୍ଧାର କରି ମୋଖା ବନ୍ଦରକୁ ସୁରକ୍ଷିତ ଭାବେ ନେଇଯାଇଛନ୍ତି। ଘଟଣାରେ କୌଣସି ପ୍ରାଣହାନି ଘଟିନାହିଁ।
ୟେମେନ ସରକାରଙ୍କ ପ୍ରାରମ୍ଭିକ ଆକଳନ ଅନୁଯାୟୀ, ଏହି ଆକ୍ରମଣ ପଛରେ ହୁତି ବିଦ୍ରୋହୀମାନଙ୍କ ହାତ ଥାଇପାରେ। ତେବେ ଭାରତ ସରକାର ଏ ପର୍ଯ୍ୟନ୍ତ କୌଣସି ସଂଗଠନର ନାମ ସରକାରୀ ଭାବେ ଉଲ୍ଲେଖ କରିନାହାନ୍ତି। ଘଟଣାର ସମସ୍ତ ଦିଗକୁ ନେଇ ତଦନ୍ତ ଚାଲିଛି। ଏହି ଘଟଣାକୁ କେନ୍ଦ୍ର ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରୀ ସର୍ବାନନ୍ଦ ସୋନୋୱାଲ କଡ଼ା ନିନ୍ଦା କରିଛନ୍ତି। ସେ କହିଛନ୍ତି, ଭାରତୀୟ ନାବିକଙ୍କ ସୁରକ୍ଷା ସରକାରଙ୍କ ସର୍ବୋଚ୍ଚ ପ୍ରାଥମିକତା ଏବଂ ସମସ୍ତ ପ୍ରକାର ସହାୟତା ପାଇଁ ସମୁଦ୍ର ପ୍ରଶାସନକୁ ଆବଶ୍ୟକ ନିର୍ଦ୍ଦେଶ ଦିଆଯାଇଛି।
ସେପଟେ ବୈଦେଶିକ ମନ୍ତ୍ରଣାଳୟ ମଧ୍ୟ ଏହି ଆକ୍ରମଣକୁ ତୀବ୍ର ନିନ୍ଦା କରିଛି। ରିୟାଦ ସ୍ଥିତ ଭାରତୀୟ ଦୂତାବାସ ୟେମେନ କର୍ତ୍ତୃପକ୍ଷଙ୍କ ସହ ନିରନ୍ତର ସମନ୍ୱୟ ରଖି ଉଦ୍ଧାର ହୋଇଥିବା ନାବିକଙ୍କ ସୁରକ୍ଷା ଓ ପରବର୍ତ୍ତୀ ବ୍ୟବସ୍ଥା ଉପରେ ନଜର ରଖିଥିବା ଜଣାପଡ଼ିଛି। ଲୋହିତ ସାଗରରେ ଲଗାତାର ଆକ୍ରମଣ ଘଟଣା ବିଶ୍ୱ ସାମୁଦ୍ରିକ ବାଣିଜ୍ୟ ଏବଂ ଜାହାଜ ଚଳାଚଳ ସୁରକ୍ଷାକୁ ନେଇ ପୁଣି ଥରେ ଚିନ୍ତା ବଢ଼ାଇଛି। ଭାରତୀୟ ଜାହାଜ ଉପରେ ଏହି ଆକ୍ରମଣ ପରେ ଆନ୍ତର୍ଜାତିକ ସାମୁଦ୍ରିକ ପଥର ସୁରକ୍ଷା ନେଇ ପୁଣି ଥରେ ପ୍ରଶ୍ନ ଉଠିଛି।
Leave a Reply