ଅକ୍ଷର ବ୍ୟୁରୋ: ଲଗାଣ ବର୍ଷା ପରେ ଫୁଲିଥିବା ନାଳରେ ମାଛ ଧରିବାକୁ ଯାଇ ଜଣେ ଯୁବକଙ୍କ ଜୀବନ ଚାଲିଯାଇଛି। କେନ୍ଦୁଝର ଜିଲ୍ଲାର ପାଟଣା ଅଞ୍ଚଳର ଅଙ୍କୁରା ନାଳରେ ପ୍ରଖର ସ୍ରୋତରେ ଭାସିଯାଇ ଯୁବକଙ୍କ ମୃତ୍ୟୁ ଘଟିଥିବା ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।
ସୂଚନା ଅନୁସାରେ, ଯୁବକ ଜଣକ ସକାଳ ସମୟରେ ଅଙ୍କୁରା ନାଳକୁ ମାଛ ଧରିବା ପାଇଁ ଯାଇଥିଲେ। ସେହି ସମୟରେ ନାଳରେ ବର୍ଷା ଯୋଗୁଁ ଜଳସ୍ତର ବହୁତ ବଢ଼ିଥିବା ସହ ପାଣିର ସ୍ରୋତ ମଧ୍ୟ ଅତ୍ୟନ୍ତ ପ୍ରଖର ଥିଲା। ଅସାବଧାନତାବଶତଃ ସେ ପାଣିରେ ଖସିପଡ଼ିଥିଲେ ଏବଂ ଦେଖୁଦେଖୁ ପ୍ରବଳ ସ୍ରୋତରେ ଭାସିଯାଇଥିଲେ। ଘଟଣା ପରେ ସ୍ଥାନୀୟ ଲୋକେ ତୁରନ୍ତ ଯୁବକଙ୍କୁ ଖୋଜାଖୋଜି ଆରମ୍ଭ କରିଥିଲେ। ଦୀର୍ଘ ସମୟ ଧରି ଖୋଜିବା ପରେ ମଧ୍ୟ ତାଙ୍କର କୌଣସି ସନ୍ଧାନ ମିଳିନଥିଲା। ପରେ ନାଳର ଅନ୍ୟ ଏକ ସ୍ଥାନରେ ତାଙ୍କ ମୃତଦେହ ଭାସୁଥିବା ଦେଖି ସ୍ଥାନୀୟ ଲୋକେ ତୁରନ୍ତ ପୁଲିସକୁ ସୂଚନା ଦେଇଥିଲେ।
ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି। ଏହାସହ ଘଟଣାର ତଦନ୍ତ ଆରମ୍ଭ କରିଛି। ପ୍ରାଥମିକ ତଦନ୍ତରୁ ପ୍ରଖର ସ୍ରୋତରେ ଭାସିଯିବା ଯୋଗୁଁ ଯୁବକଙ୍କ ମୃତ୍ୟୁ ଘଟିଥିବା ସନ୍ଦେହ କରାଯାଉଛି। ଏହି ଦୁଃଖଦ ଘଟଣା ପରେ ମୃତକଙ୍କ ପରିବାରରେ ଶୋକର ଛାୟା ନେମି ଆସିଥିବା ବେଳେ ସମଗ୍ର ପାଟଣା ଅଞ୍ଚଳରେ ମଧ୍ୟ ଶୋକର ପରିବେଶ ସୃଷ୍ଟି ହୋଇଛି। ବର୍ଷା ଋତୁରେ ନଦୀ, ନାଳ ଓ ଜଳାଶୟରେ ଜଳସ୍ତର ଏବଂ ସ୍ରୋତ ହଠାତ୍ ବଢ଼ିଯାଉଥିବାରୁ ଏଭଳି ସ୍ଥାନକୁ ଯିବାବେଳେ ସର୍ବୋଚ୍ଚ ସତର୍କତା ଅବଲମ୍ବନ କରିବାକୁ ସ୍ଥାନୀୟ ଲୋକେ ଅପିଲ କରିଛନ୍ତି।
Leave a Reply