ଏଲଆଇସି ଅଫିସରେ ଅଗ୍ନିକାଣ୍ଡ; ଜଳନ୍ତା ଫ୍ୟାନରେ ନିଆଁ ଲାଗିବାରୁ ସାରା ଅଫିସରେ ନିଆଁ ।

ଅକ୍ଷର ବ୍ୟୁରୋ: କଟକ ଏଲଆଇସି ଅଫିସରେ ଅଗ୍ନିକାଣ୍ଡ । ମାଛୁଆ ବଜାର ସ୍ଥିତ ଏଲଆଇସି ଅଫିସରେ ନିଆଁ ଲାଗିବା ଯୋଗୁ ଵ୍ୟାପକ କ୍ଷୟକ୍ଷତି ହୋଇଥିବା ଜଣାପଡ଼ିଛି । ସିଲିଂ ଫ୍ୟାନ ଅଧିକ ସମୟ ଧରି ଚାଲିଵାରୁ ଫ୍ୟାନ୍ ଟି ପୋଡି ଯାଇଥିଲା । ଜଳନ୍ତା ଫ୍ୟାନରୁ ନିଆଁ ଅଫିସ୍ କାଗଜପତ୍ର ଉପରେ ପଡିବାରୁ ସାରା ଅଫିସରେ ନିଆଁ ବ୍ୟାପି ଯାଇଥିଲା । ନିଆଁ ଲାଗିଥିବା ଦେଖି ବିଲ୍ଡିଂରେ ରହୁଥିବା ଲୋକ ଅଗ୍ନିଶମ ବାହୀନିକୁ ଖବର ଦେଇଥିଲେ । ଦମକଳ ବାହିନୀ ଠିକ୍ ସମୟରେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ସୂଚନା ଅନୁଯାୟୀ, ରାତି ପ୍ରାୟ ୧୨ଟା ୧୫ମିନିଟ ଭିତରେ ଏଲଆଇସି ଅଫିସରେ ନିଆଁ ଲାଗିଥିଲା । ସିଲିଂ ଫ୍ୟାନ ସର୍ଟସର୍କିଟ୍ ଯୋଗୁ ନିଆଁ ଲାଗିଥିଲା । ତେବେ ଏହି ଅଗ୍ନିକାଣ୍ଡ ତଳ ମହଲାରେ ହୋଇଛି । ଉପର ମହଲାକୁ ନିଆଁ ବ୍ୟାପିବା ପୂର୍ବରୁ ନିଆଁ ଆୟତ୍ତ କରି ନେଇଥିଲେ ଅଗ୍ନିଶମ ବାହିନୀ । ଏହି ଅଗ୍ନିକାଣ୍ଡ ଘଟଣାରେ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ପୋଡ଼ି ନଷ୍ଟ ହେବା ସହିତ କିଛି କଂପ୍ୟୁଟର ଓ ଆସବାବପତ୍ର ପୋଡ଼ି ନଷ୍ଟ ହୋଇଛି ।