ଅକ୍ଷର ବ୍ୟୁରୋ: ବହୁଚର୍ଚ୍ଚିତ ସୌମ୍ୟ ମୃତ୍ୟୁ ମାମଲାର ତଦନ୍ତ ଯେତିକି ଆଗକୁ ବଢ଼ୁଛି, ସେତିକି ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ଏହି ମାମଲାରେ ଗିରଫ ହୋଇଥିବା ୧୧ ଅଭିଯୁକ୍ତଙ୍କ ମଧ୍ୟରୁ ୨ ଜଣଙ୍କୁ ରିମାଣ୍ଡରେ ଆଣିବା ପାଇଁ କ୍ରାଇମବ୍ରାଞ୍ଚ ଯୋଜନା କରୁଥିବା ସୂଚନା ମିଳିଛି। ଘଟଣା ସମ୍ପର୍କରେ ଅଧିକ ତଥ୍ୟ ଓ ସମ୍ଭାବ୍ୟ ଷଡ଼ଯନ୍ତ୍ରର ସୂତ୍ର ଖୋଜିବା ଉଦ୍ଦେଶ୍ୟରେ ସେମାନଙ୍କୁ ପଚରାଉଚରା ପାଇଁ ରିମାଣ୍ଡରେ ନିଆଯିବ।
କ୍ରାଇମବ୍ରାଞ୍ଚ ସୂତ୍ର ଅନୁଯାୟୀ, ତଦନ୍ତ ଏବେ ଗୁରୁତ୍ୱପୂର୍ଣ୍ଣ ପର୍ଯ୍ୟାୟରେ ପହଞ୍ଚିଛି। ଏହା ସହିତ ଏହି ମାମଲାରେ ସମ୍ପୃକ୍ତ ଥିବା ଆହୁରି ୫ରୁ ୬ ଜଣ ଅଭିଯୁକ୍ତ ଏପର୍ଯ୍ୟନ୍ତ ଫେରାର ଥିବା ଜଣାପଡ଼ିଛି। ଫେରାର ଅଭିଯୁକ୍ତମାନଙ୍କ ମଧ୍ୟରୁ ଜଣେ, ଭାରତ ଦଳେଇ, ଗିରଫଦାରି ଆଶଙ୍କାରେ ଆଗୁଆ ଜାମିନ ପାଇଁ ହାଇକୋର୍ଟର ଦ୍ୱାରସ୍ଥ ହୋଇଥିବା ସୂଚନା ମିଳିଛି।
ଏହି ମାମଲାରେ ଗତକାଲି ରାଜ୍ୟ ସରକାର ଏକ ବଡ଼ ପଦକ୍ଷେପ ନେଇ IPS ଅଧିକାରୀ ଦୟାଲ ଗଙ୍ଗୱାରଙ୍କୁ ନିଲମ୍ବିତ କରିଛନ୍ତି। ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତି ପରେ ମାମଲାକୁ ନେଇ ରାଜନୈତିକ ଓ ପ୍ରଶାସନିକ ମହଳରେ ଚର୍ଚ୍ଚା ଜୋର ଧରିଛି। ସୌମ୍ୟଙ୍କ ମୃତ୍ୟୁ ପଛରେ କୌଣସି ଷଡ଼ଯନ୍ତ୍ର ଥିଲା କି? ତାଙ୍କୁ ମାନସିକ ଓ ଶାରୀରିକ ନିର୍ଯ୍ୟାତନା ଦିଆଯାଉଥିଲା କି? ତାଙ୍କ ଉପରେ କୌଣସି ଅହେତୁକ ଚାପ ସୃଷ୍ଟି କରାଯାଉଥିଲା କି? ଏଭଳି ଅନେକ ପ୍ରଶ୍ନ ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
ସୂତ୍ର ଅନୁସାରେ, ସୌମ୍ୟଙ୍କ ସହ IPS ଅଧିକାରୀଙ୍କ ସମ୍ପର୍କ ଓ ଲିଙ୍କ୍କୁ ନେଇ କିଛି ଗୁରୁତ୍ୱପୂର୍ଣ୍ଣ ରିପୋର୍ଟ ତଦନ୍ତକାରୀ ସଂସ୍ଥାଙ୍କ ହାତରେ ପହଞ୍ଚିବା ପରେ ଏହି କାର୍ଯ୍ୟାନୁଷ୍ଠାନ ହୋଇଥିବା ନେଇ ଚର୍ଚ୍ଚା ହେଉଛି। ଯଦିଓ ସେହି ରିପୋର୍ଟର ବିବରଣୀ ସରକାରୀ ଭାବେ ପ୍ରକାଶ ପାଇନାହିଁ, ତଥାପି ସେଥିରେ IPS ଅଧିକାରୀଙ୍କ ସମ୍ଭାବ୍ୟ ସମ୍ପୃକ୍ତି ସମ୍ବନ୍ଧୀୟ କିଛି ତଥ୍ୟ ରହିଥିବା ନେଇ ଚର୍ଚ୍ଚା ଜୋର ଧରିଛି। କ୍ରାଇମବ୍ରାଞ୍ଚ ରିମାଣ୍ଡରେ ନେବାକୁ ଯାଉଥିବା ଦୁଇ ଅଭିଯୁକ୍ତଙ୍କ ଜେରାରୁ ମାମଲାର ଅନେକ ଅଜଣା ଦିଗ ସାମ୍ନାକୁ ଆସିପାରେ ବୋଲି ଆଶା କରାଯାଉଛି। ସେହିପରି ଫେରାର ଅଭିଯୁକ୍ତମାନଙ୍କ ଗିରଫଦାରି ଓ ରିମାଣ୍ଡ ପ୍ରକ୍ରିୟା ଉପରେ ମଧ୍ୟ ତଦନ୍ତକାରୀ ସଂସ୍ଥାର ଫୋକସ୍ ରହିଛି।
Leave a Reply