ଅକ୍ଷର ବ୍ୟୁରୋ: ଅଯୋଧ୍ୟାର ରାମ ମନ୍ଦିରରେ ଦାନଅର୍ଥ ଚୋରି ମାମଲା ପରେ ଉତ୍ତରାଖଣ୍ଡର ଶ୍ରୀ ବଦ୍ରିନାଥ-କେଦାରନାଥ ମନ୍ଦିର ସମିତି ବଡ଼ ପଦକ୍ଷେପ ନେଇଛି। ସମିତି ନିଜ ଅଧୀନରେ ଥିବା ସମସ୍ତ ମନ୍ଦିରରେ ଦାନ, ଅର୍ପଣ ଓ ରାଜସ୍ୱ ପରିଚାଳନାକୁ ସମ୍ପୂର୍ଣ୍ଣ ସ୍ୱଚ୍ଛ ଏବଂ ସୁରକ୍ଷିତ କରିବା ପାଇଁ କଡ଼ା ନିର୍ଦ୍ଦେଶାବଳୀ ଜାରି କରିଛି। ଭବିଷ୍ୟତରେ କୌଣସି ପ୍ରକାର ଅନିୟମିତତା ନ ହେବା ଏହାର ମୂଳ ଉଦ୍ଦେଶ୍ୟ ବୋଲି ସମିତି ସ୍ପଷ୍ଟ କରିଛି।
ଜୁଲାଇ ୨ ତାରିଖରେ ଜାରି ହୋଇଥିବା ଆଦେଶରେ ସମିତିର ମୁଖ୍ୟ କାର୍ଯ୍ୟକାରୀ ଅଧିକାରୀ ସୋହନ ସିଂ ରଙ୍ଗର ଦାନ ଓ ଅର୍ପଣ ସମ୍ବନ୍ଧୀୟ ପ୍ରତ୍ୟେକ ପ୍ରକ୍ରିୟା ଉପରେ କଡ଼ା ନଜର ରଖିବାକୁ ନିର୍ଦ୍ଦେଶ ଦେଇଛନ୍ତି। ବଦ୍ରିନାଥ, କେଦାରନାଥ ସମେତ ସମିତି ପରିଚାଳିତ ସମସ୍ତ ମନ୍ଦିରର ଦାନ ଗଣତି କେନ୍ଦ୍ର, ଲେଖା ଶାଖା, କୋଷାଗାର, ପୂଜା କାଉଣ୍ଟର ଏବଂ ଅତିଥି ଗୃହ ସହ ଜଡ଼ିତ ସମସ୍ତ ଅଧିକାରୀ ଓ କର୍ମଚାରୀଙ୍କ କାର୍ଯ୍ୟକଳାପ ଉପରେ ସ୍ୱତନ୍ତ୍ର ନଜରଦାରି କରାଯିବ।
ନୂଆ ନିର୍ଦ୍ଦେଶାବଳୀରେ ସ୍ପଷ୍ଟ କରାଯାଇଛି ଯେ ନଗଦ ଦାନ, ସୁନା-ରୂପା, ମୂଲ୍ୟବାନ ସାମଗ୍ରୀ କିମ୍ବା ଭକ୍ତଙ୍କ ଅର୍ପଣରେ କୌଣସି ପ୍ରକାରର ଅନିୟମିତତା କିମ୍ବା ଅବହେଳାକୁ ବରଦାସ୍ତ କରାଯିବ ନାହିଁ। ଦାନ ସଂଗ୍ରହ, ସୁରକ୍ଷା, ହିସାବ ରକ୍ଷଣ ଏବଂ ରାଜସ୍ୱ ପରିଚାଳନାରେ ସମ୍ପୂର୍ଣ୍ଣ ପାରଦର୍ଶିତା ରଖିବା ସମସ୍ତ ସମ୍ପୃକ୍ତ କର୍ମଚାରୀଙ୍କ ପାଇଁ ବାଧ୍ୟତାମୂଳକ କରାଯାଇଛି। ସମିତି କହିଛି ଯେ, ନିକଟରେ ଅଯୋଧ୍ୟାର ଶ୍ରୀରାମ ମନ୍ଦିରରେ ଦାନ ଓ ଅର୍ପଣ ସମ୍ବନ୍ଧୀୟ ଅନିୟମିତତା ଖବର ଗଣମାଧ୍ୟମରେ ସାମ୍ନାକୁ ଆସିବା ପରେ ଏହି ପଦକ୍ଷେପ ନିଆଯାଇଛି। ଭକ୍ତଙ୍କ ବିଶ୍ୱାସ ଅକ୍ଷୁଣ୍ଣ ରଖିବା ସହ ମନ୍ଦିର ପରିଚାଳନାରେ ସ୍ୱଚ୍ଛତା ଏବଂ ଜବାବଦେହିତା ସୁନିଶ୍ଚିତ କରିବାକୁ ସମିତି ଏହି କଡ଼ା ନିଷ୍ପତ୍ତି ନେଇଛି।
ସମିତି ଆହୁରି ସ୍ପଷ୍ଟ କରିଛି ଯେ, ଭବିଷ୍ୟତରେ ଦାନ କିମ୍ବା ଅର୍ପଣ ପରିଚାଳନାରେ କୌଣସି ପ୍ରକାରର ଅନିୟମିତତା, ଅବହେଳା କିମ୍ବା ଆର୍ଥିକ ଗଡ଼ବଡ଼ ଧରାପଡ଼ିଲେ ସମ୍ପୃକ୍ତ ଅଧିକାରୀ ଓ କର୍ମଚାରୀଙ୍କ ବିରୋଧରେ କଠୋର ପ୍ରଶାସନିକ ଓ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ। ଭକ୍ତଙ୍କ ଆସ୍ଥା ଏବଂ ମନ୍ଦିର ପରିଚାଳନାର ବିଶ୍ୱସନୀୟତା ବଜାୟ ରଖିବା ଦିଗରେ ବଦ୍ରିନାଥ-କେଦାରନାଥ ମନ୍ଦିର ସମିତିର ଏହି ପଦକ୍ଷେପକୁ ଏକ ଗୁରୁତ୍ୱପୂର୍ଣ୍ଣ ଓ ସମୟୋପଯୋଗୀ ନିଷ୍ପତ୍ତି ବୋଲି ଦେଖାଯାଉଛି।
Leave a Reply