ଅକ୍ଷର ବ୍ୟୁରୋ: ଶ୍ରୀଜଗନ୍ନାଥ କେବଳ ଭକ୍ତଙ୍କ ଆରାଧ୍ୟ ଦେବତା ନୁହଁନ୍ତି, ସେ ଘରର ଜଣେ ଆପଣାର ମଣିଷ। ସେଥିପାଇଁ ମହାପ୍ରଭୁଙ୍କ ପ୍ରତ୍ୟେକ ନୀତିକାନ୍ତି ମାନବ ଜୀବନର ଦୈନନ୍ଦିନ ଆଚାର-ବ୍ୟବହାର ସହ ନିବିଡ଼ ଭାବେ ଜଡ଼ିତ। ପବିତ୍ର ଦେବସ୍ନାନ ପୂର୍ଣ୍ଣିମା ଅବସରରେ ଶ୍ରୀମନ୍ଦିରରେ ସକାଳୁ ସକାଳୁ ବିଭିନ୍ନ ପାରମ୍ପରିକ ନୀତି ସମ୍ପନ୍ନ ହେଉଥିବାବେଳେ, ସେଥିମଧ୍ୟରୁ ମୁତୁରି କାଠିରେ ଦାନ୍ତଘଷା ନୀତି ଭକ୍ତମାନଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି।
ଔଷଧୀୟ ଗୁଣରେ ଭରପୂର ସୁଗନ୍ଧିତ ମୁତୁରି କାଠିରେ ମହାପ୍ରଭୁଙ୍କ ଦାନ୍ତଘଷା କରାଯିବା କେବଳ ଏକ ରୀତିନୀତି ନୁହେଁ, ବରଂ ମହାପ୍ରଭୁଙ୍କ ମାନବୀୟ ଲୀଳାର ଏକ ଅନନ୍ୟ ପ୍ରତୀକ। ଭକ୍ତମାନଙ୍କ ବିଶ୍ୱାସ, ଶ୍ରୀଜିଉଙ୍କ ପ୍ରତ୍ୟେକ ନୀତି ମାନବ ସମାଜକୁ ସୁସଂସ୍କାର, ପରିଚ୍ଛନ୍ନତା ଓ ଶୃଙ୍ଖଳିତ ଜୀବନର ବାର୍ତ୍ତା ପ୍ରଦାନ କରେ। ଦାନ୍ତଘଷା ପରେ ମହାପ୍ରଭୁଙ୍କ ଅନ୍ୟାନ୍ୟ ସକାଳ ନୀତି ସମ୍ପନ୍ନ ହେବା ପରେ ଚତୁର୍ଦ୍ଧାମୂର୍ତ୍ତି ଧାଡ଼ି ପହଣ୍ଡିରେ ରତ୍ନବେଦିରୁ ସ୍ନାନବେଦିକୁ ବିଜେ କରିବେ। ସେଠାରେ ପରମ୍ପରା ଅନୁଯାୟୀ ୧୦୮ ଗରା ସୁବାସିତ ପବିତ୍ର ଜଳରେ ମହାସ୍ନାନ ଅନୁଷ୍ଠିତ ହେବ। ବର୍ଷକୁ ଥରେ ହେଉଥିବା ଏହି ଦିବ୍ୟ ସ୍ନାନଲୀଳାର ସାକ୍ଷୀ ହେବା ପାଇଁ ସକାଳୁ ସକାଳୁ ପୁରୀ ବଡ଼ଦାଣ୍ଡରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଛି।
କାହାର ହାତରେ ତୁଳସୀମାଳା, କାହାର ମୁଖରେ ‘ହରିବୋଲ’ ଓ ‘ଜୟ ଜଗନ୍ନାଥ’ ଧ୍ୱନି। ଭକ୍ତଙ୍କ ମନରେ ଗୋଟିଏ ମାତ୍ର ଆକାଂକ୍ଷା—ଚକାନୟନଙ୍କ ଦିବ୍ୟ ଦର୍ଶନ କରି ଜୀବନକୁ ଧନ୍ୟ କରିବା। ସ୍ନାନପୂର୍ଣ୍ଣିମା କେବଳ ଏକ ଧାର୍ମିକ ପର୍ବ ନୁହେଁ, ଏହା ଭକ୍ତ ଓ ଭଗବାନଙ୍କ ମଧ୍ୟରେ ଆଧ୍ୟାତ୍ମିକ ସମ୍ପର୍କର ଏକ ମହାମିଳନ। ଆଉ କିଛି ସମୟ ପରେ ସ୍ନାନବେଦିରେ ୧୦୮ ଗରା ସୁବାସିତ ଜଳରେ ମହାପ୍ରଭୁଙ୍କ ମହାସ୍ନାନ ଅନୁଷ୍ଠିତ ହେବ। ଏହାପରେ କାଳିଆ ସାଆନ୍ତ ସମଗ୍ର ବିଶ୍ୱକୁ ଦିବ୍ୟ ଦର୍ଶନ ଦେବେ। ସେହି ଐତିହାସିକ ଓ ଆଧ୍ୟାତ୍ମିକ ମୁହୂର୍ତ୍ତର ସାକ୍ଷୀ ହେବାକୁ କୋଟି କୋଟି ଭକ୍ତ ଅଧୀର ଅପେକ୍ଷାରେ ଥିବାବେଳେ ଜୟ ଜଗନ୍ନାଥ ଧ୍ୱନିରେ ଏବେଠାରୁ ପ୍ରକମ୍ପିତ ହେଉଛି ସମଗ୍ର ଶ୍ରୀକ୍ଷେତ୍ର।
Leave a Reply