ଅକ୍ଷର ବ୍ୟୁରୋ: ମାଲକାନଗିରି ଜିଲ୍ଲାରେ ଘଟିଛି ଏକ ହୃଦୟବିଦାରକ ସଡ଼କ ଦୁର୍ଘଟଣା। ଓର୍କେଲ ଥାନା ଅଧୀନ ନୀଳାଦ୍ରୀନଗର ଛକ ନିକଟରେ ଏକ ଠିଆ ଥିବା ସରକାରୀ ଅଲଟ୍ରା ବସ୍କୁ ବାଇକ୍ ଧକ୍କା ଦେବାରୁ ଦୁଇ ଯୁବକଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି।
ପୁଲିସ ସୂଚନା ଅନୁଯାୟୀ, ଓଡି-୧୦-ସି-୪୨୨୫ ନମ୍ବର ବିଶିଷ୍ଟ ସରକାରୀ ଅଲଟ୍ରା ବସ୍ ଭୋରୁରୁ ଜୟପୁର ଯିବା ପାଇଁ ନୀଳାଦ୍ରୀନଗର ଗ୍ରାମ ନିକଟରେ ରାସ୍ତା ପାର୍ଶ୍ୱରେ ବାଲିମେଳା ଅଭିମୁଖେ ମୁହଁ କରି ଠିଆ ହୋଇଥିଲା। ସେହି ସମୟରେ ବାଲିମେଳା ଡ୍ରାଇଭର ଲାଇନର ସୁରେନ୍ଦ୍ର ଶବର ଓ ତାଙ୍କ ବନ୍ଧୁ ଦେବେନ୍ଦ୍ର ପାତ୍ର, ଯିଏ କଳାହାଣ୍ଡିରୁ ଘରକୁ ବୁଲିବାକୁ ଆସିଥିଲେ, ଏକ ବାଇକ୍ରେ ସୋର୍ଲକୋଣ୍ଡା ବ୍ୟାରେଜ ପଟରୁ ବାଲିମେଳା ଅଭିମୁଖେ ଯାଉଥିଲେ। କୌଣସି କାରଣବଶତଃ ବାଇକ୍ଟି ନିୟନ୍ତ୍ରଣ ହରାଇ ଠିଆ ଥିବା ବସ୍ର ପଛପଟକୁ ପ୍ରଚଣ୍ଡ ବେଗରେ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ, ବାଇକ୍ଟି ବସ୍ର ପଛପଟ ତଳେ ପଶିଯାଇଥିଲା। ଏଥିରେ ଉଭୟ ଆରୋହୀ ଗୁରୁତର ଆହତ ହୋଇଥିଲେ।
ଦୁର୍ଘଟଣା ପରେ ସ୍ଥାନୀୟ ଲୋକ ଓ ଓର୍କେଲ ପୁଲିସ ମିଳିତ ଭାବେ ଉଭୟଙ୍କୁ ବସ୍ ତଳୁ ଉଦ୍ଧାର କରି ବାଲିମେଳା ମେଡିକାଲକୁ ନେଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ଅବସ୍ଥା ସଙ୍କଟାପନ୍ନ ଥିବାରୁ ଦୁହେଁଙ୍କୁ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ଦେବେନ୍ଦ୍ର ପାତ୍ରଙ୍କ ସ୍ୱାସ୍ଥ୍ୟ ଅଧିକ ସଙ୍କଟାପନ୍ନ ହେବାରୁ ତାଙ୍କୁ କୋରାପୁଟ ମେଡିକାଲକୁ ରେଫର କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ଅନ୍ୟପଟେ, ସୁରେନ୍ଦ୍ର ଶବରଙ୍କର ମଧ୍ୟ ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିବା ଜଣାପଡ଼ିଛି।
ଓର୍କେଲ ଥାନା ଅଧିକାରୀ ଦେବଦତ୍ତ ମଲ୍ଲିକଙ୍କ ନିର୍ଦ୍ଦେଶକ୍ରମେ ଏଏସଆଇ ସତଦଳ ମଣ୍ଡଳଙ୍କ ନେତୃତ୍ୱରେ ପୁଲିସର ଏକ ସ୍ୱତନ୍ତ୍ର ଟିମ୍ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ବସ୍ ଓ ବାଇକ୍କୁ ଜବତ କରିଛି। ପୁଲିସ ମାମଲା ନଂ-୧୯୫/୨୬ ରୁଜୁ କରି ଦୁର୍ଘଟଣାର ପ୍ରକୃତ କାରଣ ଖୋଜିବା ପାଇଁ ତଦନ୍ତ ଜାରି ରଖିଛି। ଉଭୟ ମୃତକଙ୍କ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ଥାନା ଅଧିକାରୀ ସୂଚନା ଦେଇଛନ୍ତି। ଏହି ମର୍ମନ୍ତୁଦ ସଡ଼କ ଦୁର୍ଘଟଣାରେ ଦୁଇ ଯୁବକଙ୍କ ଅକାଳ ମୃତ୍ୟୁ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇଛି। ଦୁର୍ଘଟଣାର ପ୍ରକୃତ କାରଣ ଏବଂ ବାଇକ୍ ନିୟନ୍ତ୍ରଣ ହରାଇବା ପଛରେ ଥିବା ପରିସ୍ଥିତିକୁ ନେଇ ପୁଲିସ ତଦନ୍ତ ଜାରି ରଖିଛି।
Leave a Reply