ଅକ୍ଷର ବ୍ୟୁରୋ: ମହାନଦୀ ଜଳ ବିବାଦ ଟ୍ରିବ୍ୟୁନାଲର ଅବଧି ୯ ମାସ ବୃଦ୍ଧି କଲେ କେନ୍ଦ୍ର ସରକାର । ମହାନଦୀ ଜଳ ବିବାଦର ସମାଧାନ ପାଇଁ ଗଠିତ ‘ମହାନଦୀ ଜଳ ବିବାଦ ଟ୍ରିବ୍ୟୁନାଲ’ର କାର୍ଯ୍ୟକାଳକୁ କେନ୍ଦ୍ର ଜଳ ଶକ୍ତି ମନ୍ତ୍ରଣାଳୟ ପୁଣିଥରେ ବୃଦ୍ଧି କରିଛନ୍ତି । ନୂତନ ନିର୍ଦ୍ଦେଶନାମା ଅନୁଯାୟୀ, ଟ୍ରିବ୍ୟୁନାଲର ଅବଧିକୁ ୧୪ ଏପ୍ରିଲ ୨୦୨୬ ଠାରୁ ଆଉ ୯ ମାସ ପାଇଁ ବଢ଼ାଇ ଦିଆଯାଇଛି । ଟ୍ରିବ୍ୟୁନାଲ୍ ବର୍ତ୍ତମାନ ୧୩ ଜାନୁଆରୀ ୨୦୨୭ ସୁଦ୍ଧା ନିଜର ଚୂଡ଼ାନ୍ତ ରିପୋର୍ଟ ଏବଂ ନିଷ୍ପତ୍ତି ପ୍ରଦାନ କରିବାକୁ ସମୟ ପାଇଛନ୍ତି । ମାର୍ଚ୍ଚ ୨୦୨୪ରେ ତତ୍କାଳୀନ ଅଧ୍ୟକ୍ଷ ଜଷ୍ଟିସ୍ ଏ.ଏମ୍. ଖାନୱିଲକରଙ୍କ ଇସ୍ତଫା ପରେ ନୂତନ ଅଧ୍ୟକ୍ଷ ନିଯୁକ୍ତି ପର୍ଯ୍ୟନ୍ତ ପ୍ରାୟ ୯ ମାସ ଧରି ଟ୍ରିବ୍ୟୁନାଲର କାର୍ଯ୍ୟ ବାଧାପ୍ରାପ୍ତ ହୋଇଥିଲା ।
ଏହି ସମୟକୁ ‘ଅଣ-କାର୍ଯ୍ୟକ୍ଷମ’ ଅବଧି ଭାବେ ବିବେଚନା କରି ସରକାର ଏହି ସମୟ ସୀମା ବୃଦ୍ଧି କରିଛନ୍ତି । ଓଡ଼ିଶା, ଛତିଶଗଡ଼ ମଧ୍ୟରେ ମହାନଦୀ ଜଳ ବଣ୍ଟନକୁ ନେଇ ଦେଖାଦେଇଥିବା ବିବାଦର ସମାଧାନ ପାଇଁ ୧୨ ମାର୍ଚ୍ଚ ୨୦୧୮ରେ ଏହି ଟ୍ରିବ୍ୟୁନାଲ୍ ଗଠନ କରାଯାଇଥିଲା । ପୂର୍ବରୁ କୋଭିଡ ମହାମାରୀ ଏବଂ ଅନ୍ୟାନ୍ୟ କାରଣରୁ ଏହାର ଅବଧିକୁ ଏକାଧିକ ବାର ବୃଦ୍ଧି କରାଯାଇଛି । ଅନ୍ତଃ-ରାଜ୍ୟ ନଦୀ ଜଳ ବିବାଦ ଅଧିନିୟମ, ୧୯୫୬ ଅନୁଯାୟୀ କେନ୍ଦ୍ର ସରକାର ଏହି ପଦକ୍ଷେପ ଗ୍ରହଣ କରିଛନ୍ତି । ଏହି ନିଷ୍ପତ୍ତି ଦ୍ୱାରା ମହାନଦୀ ଜଳ ବିବାଦର ସମାଧାନ ପ୍ରକ୍ରିୟା ଆଉ କିଛି ମାସ ଘୁଞ୍ଚି ଯାଇଛି ।
Leave a Reply