ଅକ୍ଷର ବ୍ୟୁରୋ: ନବରଙ୍ଗପୁର ସହରରେ ସକାଳୁ ସକାଳୁ ଏକ ବଡ଼ ଅଘଟଣ ଅଳ୍ପକେ ଟଳିଯାଇଛି। ଚଳନ୍ତା ସ୍କୁଟିରେ ହଠାତ୍ ନିଆଁ ଲାଗିଯିବାରୁ ମୁହୂର୍ତ୍ତକେ ଗାଡ଼ିଟି ହୁତୁହୁତୁ ହୋଇ ଜଳି ପାଉଁଶ ହୋଇଯାଇଛି। ତେବେ ସ୍କୁଟି ଚାଳକ, ପୂଜାରୀଗୁଡ଼ା ଗାଁ ବିଦ୍ୟାଳୟର ଶିକ୍ଷକ ସନ୍ଦୀପ ପଣ୍ଡା, ସମୟ ଥାଉଥାଉ ଗାଡ଼ିରୁ ଓହ୍ଲାଇ ପଡ଼ିଥିବାରୁ ଏକ ବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତିଯାଇଛନ୍ତି।
ସୂଚନା ଅନୁଯାୟୀ, ସନ୍ଦୀପ ପଣ୍ଡା ପ୍ରତିଦିନ ଭଳି ସ୍କୁଟି ଯୋଗେ ବିଦ୍ୟାଳୟକୁ ଯାଉଥିଲେ। ନବରଙ୍ଗପୁର ସହରର ଏକ ରିସର୍ଟ ନିକଟରେ ପହଞ୍ଚିବା ପରେ ହଠାତ୍ ସ୍କୁଟିଟି ବନ୍ଦ ହୋଇଯାଇଥିଲା। ଗାଡ଼ିରେ କୌଣସି ତ୍ରୁଟି ହୋଇଥିବା ସନ୍ଦେହରେ ସେ ରାସ୍ତା କଡ଼ରେ ଅଟକାଇ ଯାଞ୍ଚ କରୁଥିବା ବେଳେ ସ୍କୁଟିର ପଛପଟୁ ଧୂଆଁ ବାହାରୁଥିବା ଦେଖିଥିଲେ। ଦେଖୁ ଦେଖୁ କିଛି ସମୟ ମଧ୍ୟରେ ସ୍କୁଟିରେ ନିଆଁ ବ୍ୟାପିଯାଇଥିଲା। ମୁହୂର୍ତ୍ତକ ମଧ୍ୟରେ ନିଆଁ ସମଗ୍ର ଗାଡ଼ିକୁ କବଳିତ କରିଥିଲା। ସ୍ଥାନୀୟ ଲୋକେ ଘଟଣା ଦେଖି ଅଗ୍ନିଶମ ବାହିନୀକୁ ଖବର ଦେଇଥିଲେ।
ଖବର ପାଇ ଅଗ୍ନିଶମ ବାହିନୀର ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। କିନ୍ତୁ ସେତେବେଳକୁ ସ୍କୁଟିଟି ସମ୍ପୂର୍ଣ୍ଣ ଭାବେ ପୋଡ଼ି ପାଉଁଶ ହୋଇଯାଇଥିଲା। ଘଟଣାରେ କୌଣସି ଜୀବନହାନି ଘଟିନଥିବା ବେଳେ ଚାଳକଙ୍କ ସୁରକ୍ଷିତ ଉଦ୍ଧାର ସମସ୍ତଙ୍କ ପାଇଁ ଆଶ୍ୱସ୍ତିର ବିଷୟ ପାଲଟିଛି। ପ୍ରାଥମିକ ଭାବେ ଗାଡ଼ିର ବୈଦ୍ୟୁତିକ ତ୍ରୁଟି କିମ୍ବା ସର୍ଟ ସର୍କିଟ୍ ଯୋଗୁଁ ନିଆଁ ଲାଗିଥିବା ସନ୍ଦେହ କରାଯାଉଛି। ତେବେ ପ୍ରକୃତ କାରଣ ସମ୍ପର୍କରେ ତଦନ୍ତ ଚାଲିଛି। ଏହି ଘଟଣା ପୁଣିଥରେ ଚଳନ୍ତା ଯାନରେ ଅଗ୍ନିକାଣ୍ଡ ଭଳି ଘଟଣାକୁ ନେଇ ସୁରକ୍ଷା ପ୍ରତି ସଚେତନ ରହିବା ଏବଂ ଗାଡ଼ିର ନିୟମିତ ସର୍ଭିସିଂର ଆବଶ୍ୟକତାକୁ ସାମ୍ନାକୁ ଆଣିଛି।
Leave a Reply