ନ୍ୟୁୟର୍କ: ହିମାଳୟ ଅଞ୍ଚଳରେ ବଢ଼ୁଥିବା ଜଳବାୟୁ ବିପଦର ମୁକାବିଲା ପାଇଁ ଭାରତ ଓ ଚୀନ୍ ସହ ମିଳିତ ଭାବେ କାମ କରିବାକୁ ଆହ୍ୱାନ ଦେଇଛି ନେପାଳ। ଜାତିସଂଘ ସାଧାରଣ ପରିଷଦର ୮୧ତମ ଅଧିବେଶନରେ ନେପାଳ ପ୍ରଧାନମନ୍ତ୍ରୀ ବାଲେନ୍ଦ୍ର ଶାହ ଏକ ‘ହିମାଳୟ କ୍ଲାଇମେଟ୍ ରେଜିଲିଏନ୍ସ ମେକାନିଜମ୍’ ଗଠନର ପ୍ରସ୍ତାବ ରଖିଛନ୍ତି। ଏହି ତ୍ରିପାକ୍ଷିକ ବ୍ୟବସ୍ଥାରେ ନେପାଳ, ଭାରତ ଓ ଚୀନ୍ ମଧ୍ୟରେ ସାଟେଲାଇଟ୍ ତଥ୍ୟ ଓ ବୈଷୟିକ ଜ୍ଞାନ ବାଣ୍ଟିବା ସହ ହିମାଳୟର ବିପଦପ୍ରବଣ ଅଞ୍ଚଳ ଉପରେ ମିଳିତ ନଜର ରଖିବାର ପ୍ରସ୍ତାବ ରହିଛି।
ଶାହଙ୍କ ପ୍ରସ୍ତାବ ଅନୁସାରେ, ତିନି ଦେଶ ମିଳିତ ଭାବେ ବିପଦପୂର୍ଣ୍ଣ ହିମବାହ ହ୍ରଦଗୁଡ଼ିକର ନିରୀକ୍ଷଣ କରିବେ। ଏଥିସହ ଯୁକ୍ତ ଆଗୁଆ ବିପଦ ସତର୍କ ସୂଚନା ବ୍ୟବସ୍ଥାକୁ ଅଧିକ ସୁଦୃଢ଼ କରାଯିବ। ବନ୍ୟା, ଭୂସ୍ଖଳନ କିମ୍ବା ଅନ୍ୟ ବଡ଼ ପ୍ରାକୃତିକ ବିପର୍ଯ୍ୟୟ ସମୟରେ ସୀମାପାର ଉଦ୍ଧାର ଓ ରିଲିଫ୍ କାର୍ଯ୍ୟରେ ମଧ୍ୟ ତିନି ଦେଶ ମଧ୍ୟରେ ସମନ୍ୱୟ ରଖିବାକୁ ସେ କହିଛନ୍ତି। ହିମାଳୟକୁ କେବଳ ଦେଶଗୁଡ଼ିକ ମଧ୍ୟରେ ଏକ ସୀମା ଭାବେ ନଦେଖି ଅନ୍ତର୍ଜାତୀୟ ସହଯୋଗର କେନ୍ଦ୍ରରେ ପରିଣତ କରିବାକୁ ଶାହ ଆହ୍ୱାନ ଦେଇଛନ୍ତି। ଖଣ୍ଡବିଖଣ୍ଡ ତଥ୍ୟ ଓ ସୀମିତ ସମନ୍ୱୟ ପରିବର୍ତ୍ତେ ହିମାଳୟ ଅଞ୍ଚଳକୁ ଅନ୍ତର୍ଜାତୀୟ ସହଯୋଗର ଏକ ‘ପରୀକ୍ଷାଗାର’ କରିବାକୁ ସେ ପ୍ରସ୍ତାବ ରଖିଛନ୍ତି।
ଶାହଙ୍କ ଅନୁସାରେ, ହିନ୍ଦୁକୁଶ-ହିମାଳୟ ଅଞ୍ଚଳ ପ୍ରାୟ ୨୦୦ କୋଟି ଲୋକଙ୍କ ଜଳ, କୃଷି, ପରିବେଶ ଓ ଜୀବିକା ସହ ଜଡ଼ିତ। ତେଣୁ ଏହି ଅଞ୍ଚଳରେ ଜଳବାୟୁ ପରିବର୍ତ୍ତନର ପ୍ରଭାବ କେବଳ ଗୋଟିଏ ଦେଶ ମଧ୍ୟରେ ସୀମିତ ରହିବ ନାହିଁ। ହିମବାହ ଗଳିବା, ପାହାଡ଼ ଢାଲ ଅସ୍ଥିର ହେବା, ହିମ-ପଥର ଧସ, ବନ୍ୟା ଓ ଭୂସ୍ଖଳନ ଭଳି ବିପଦ ବଢ଼ିବା ନେଇ ମଧ୍ୟ ସେ ଚିନ୍ତା ପ୍ରକାଶ କରିଛନ୍ତି। ନିକଟରେ ନେପାଳରେ ଘଟିଥିବା ବିନାଶକାରୀ ବନ୍ୟା ଓ ହିମାଳୟ ଅଞ୍ଚଳର ବିପର୍ଯ୍ୟୟକୁ ଉଲ୍ଲେଖ କରି ଶାହ ଏହାକୁ କେବଳ ନେପାଳର ଦୁର୍ଘଟଣା ନୁହେଁ, ବରଂ ସମଗ୍ର ବିଶ୍ୱ ପାଇଁ ଏକ ସତର୍କ ସଙ୍କେତ ବୋଲି କହିଛନ୍ତି। ସେ ଏହି ବିପର୍ଯ୍ୟୟ ପରେ ସହାୟତା ପାଇଁ ଭାରତ ଓ ଚୀନ୍ ସମେତ ସହଯୋଗ କରିଥିବା ଦେଶଗୁଡ଼ିକୁ ମଧ୍ୟ କୃତଜ୍ଞତା ଜଣାଇଛନ୍ତି।
ତିନି ଦେଶ ପାଇଁ ନେପାଳର ପ୍ରସ୍ତାବ:
ସାଟେଲାଇଟ୍ ତଥ୍ୟ ଓ ବୈଷୟିକ ଜ୍ଞାନ ଆଦାନପ୍ରଦାନ
ବିପଦପୂର୍ଣ୍ଣ ହିମବାହ ହ୍ରଦର ମିଳିତ ନିରୀକ୍ଷଣ
ଯୁକ୍ତ ଆଗୁଆ ବିପଦ ସତର୍କ ସୂଚନା ବ୍ୟବସ୍ଥା
ବନ୍ୟା ଓ ଭୂସ୍ଖଳନ ସମୟରେ ସୀମାପାର ଉଦ୍ଧାର-ସହାୟତାରେ ସମନ୍ୱୟ
ହିମାଳୟ ଅଞ୍ଚଳକୁ ଅନ୍ତର୍ଜାତୀୟ ସହଯୋଗର ‘ପରୀକ୍ଷାଗାର’ରେ ପରିଣତ କରିବା
Leave a Reply