ନୂଆଦିଲ୍ଲୀ: ସୀମାପାର ଆତଙ୍କବାଦୀ ଷଡ଼ଯନ୍ତ୍ର ଓ କଟ୍ଟରପନ୍ଥୀ ଗତିବିଧି ସମ୍ପର୍କିତ ଏକ ମାମଲାର ତଦନ୍ତକୁ ନେଇ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ମଙ୍ଗଳବାର ଦେଶର ୩ଟି ରାଜ୍ୟରେ ବଡ଼ଧରଣର ଚଢ଼ାଉ କରିଛି। ଆସାମ, ପଶ୍ଚିମବଙ୍ଗ ଓ କେରଳର ମୋଟ ୧୬ଟି ଭିନ୍ନ ଭିନ୍ନ ସ୍ଥାନରେ ଏକକାଳୀନ ତଲାସି ଅଭିଯାନ ଚାଲିଛି।
ଏନଆଇଏ ସୂଚନା ଅନୁଯାୟୀ, ବାଂଲାଦେଶର ନିଷିଦ୍ଧ ଆତଙ୍କବାଦୀ ସଂଗଠନ ‘ଜମାତ-ଉଲ୍-ମୁଜାହିଦ୍ଦିନ୍ ବାଂଲାଦେଶ’ (ଜେଏମବି)ର ଏକ ଶାଖା ବୋଲି ଉଲ୍ଲେଖ ହୋଇଥିବା ‘ଇମାମ୍ ମହମୁଦେର କାଫିଲା’ (ଆଇଏମକେ) ସହ ସମ୍ପର୍କିତ ଆସାମର ଏକ ମାମଲାକୁ ନେଇ ଏହି କାର୍ଯ୍ୟାନୁଷ୍ଠାନ କରାଯାଇଛି। ଚଢ଼ାଉ ହେଉଥିବା ୧୬ଟି ସ୍ଥାନ ମଧ୍ୟରୁ ଆସାମରେ ୧୦ଟି, ପଶ୍ଚିମବଙ୍ଗରେ ୫ଟି ଏବଂ କେରଳରେ ୧ଟି ସ୍ଥାନ ରହିଛି। ସନ୍ଦିଗ୍ଧ ବ୍ୟକ୍ତିମାନଙ୍କ ଠିକଣା ଓ ସେମାନଙ୍କ ସହ ସମ୍ପର୍କିତ ସ୍ଥାନରେ ତଦନ୍ତକାରୀ ଟିମ୍ ପକ୍ଷରୁ ନଥିପତ୍ର, ଡିଜିଟାଲ୍ ତଥ୍ୟ ଏବଂ ଅନ୍ୟାନ୍ୟ ସାମଗ୍ରୀ ଯାଞ୍ଚ କରାଯାଉଛି।
ତଦନ୍ତକାରୀ ସଂସ୍ଥାର ଅଭିଯୋଗ ଅନୁଯାୟୀ, ଆଇଏମକେ ନେଟୱାର୍କ ସହ ଜଡ଼ିତ ସନ୍ଦିଗ୍ଧଙ୍କ ସୀମାପାର ସମ୍ପର୍କ, ଯୁବକମାନଙ୍କୁ କଟ୍ଟରପନ୍ଥୀ ଚିନ୍ତାଧାରା ଆଡ଼କୁ ନେବା ଏବଂ ବେଆଇନ ଗତିବିଧି ସମ୍ପର୍କରେ ପ୍ରମାଣ ସଂଗ୍ରହ କରିବା ଏହି ଚଢ଼ାଉର ମୁଖ୍ୟ ଉଦ୍ଦେଶ୍ୟ। ଆସାମରେ ଏହି ନେଟୱାର୍କ ନିଜର ଜାଲ ବିଛାଇଥିବା ଏବଂ ସୀମାପାରରୁ କିଛି କାର୍ଯ୍ୟକଳାପ ନିୟନ୍ତ୍ରିତ ହେଉଥିବା ସନ୍ଦେହକୁ ମଧ୍ୟ ଏନଆଇଏ ତଦନ୍ତ କରୁଛି। ଚଢ଼ାଉ ସମୟରେ ମିଳିଥିବା ନଥିପତ୍ର ଓ ଅନ୍ୟାନ୍ୟ ସାମଗ୍ରୀର ଯାଞ୍ଚ ସହ ସନ୍ଦିଗ୍ଧ ବ୍ୟକ୍ତିମାନଙ୍କୁ ପଚରାଉଚରା ମଧ୍ୟ ଜାରି ରହିଛି। ତଲାସି ପରେ ଠାବ ତଥ୍ୟ, ଜବତ ସାମଗ୍ରୀ ଓ ତଦନ୍ତରୁ ମିଳୁଥିବା ତଥ୍ୟ ଆଧାରରେ ମାମଲାର ପରବର୍ତ୍ତୀ ତଦନ୍ତ ଆଗକୁ ବଢ଼ିବ।
Leave a Reply