ଉଜ୍ଜୈନ: ମଧ୍ୟପ୍ରଦେଶର ଉଜ୍ଜୈନରେ ଶାହି ମସଜିଦର ଏକ ଅଂଶକୁ ରାସ୍ତା ପ୍ରଶସ୍ତୀକରଣ ପାଇଁ ହଟାଇବାକୁ ନେଇ ଉତ୍ତେଜନା ସୃଷ୍ଟି ହୋଇଛି। ଅବଦାଲପୁର ଅଞ୍ଚଳରେ ପ୍ରଶାସନିକ କାର୍ଯ୍ୟାନୁଷ୍ଠାନ ସମୟରେ ପୋଲିସ ଓ ପ୍ରତିବାଦକାରୀଙ୍କ ମଧ୍ୟରେ ଉତ୍ତେଜନା ଦେଖାଦେବା ସହ ପୋଲିସ ଉପରକୁ ପଥରମାଡ଼ ହୋଇଥିବା ରିପୋର୍ଟ ମିଳିଛି। ପରିସ୍ଥିତି ନିୟନ୍ତ୍ରଣ ପାଇଁ ପୋଲିସ ଲୁହବୁହା ଗ୍ୟାସ୍ ବ୍ୟବହାର କରିଛି।
ସୂଚନା ଅନୁସାରେ, ରାସ୍ତା ପ୍ରଶସ୍ତୀକରଣ ପ୍ରକଳ୍ପରେ ଶାହି ମସଜିଦର କିଛି ଅଂଶ ପଡ଼ୁଥିବାରୁ ତାହାକୁ ହଟାଇବା ପାଇଁ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉଥିଲା। ଏହାକୁ ନେଇ ସ୍ଥାନୀୟ ଅଞ୍ଚଳରେ ବିରୋଧ ପ୍ରଦର୍ଶନ ହୋଇଥିଲା। ରିପୋର୍ଟ ଅନୁସାରେ, ମସଜିଦର ପ୍ରଭାବିତ ଅଂଶକୁ ନେଇ ସମ୍ପ୍ରଦାୟ ମଧ୍ୟରେ ମଧ୍ୟ ଭିନ୍ନ ମତ ଦେଖାଦେଇଥିଲା।ପରିସ୍ଥିତିକୁ ଦୃଷ୍ଟିରେ ରଖି ଅଞ୍ଚଳରେ ୨୦୦୦ରୁ ଅଧିକ ପୋଲିସ କର୍ମଚାରୀ ମୁତୟନ କରାଯାଇଛି। ଏହା ସହ ରାପିଡ୍ ଆକ୍ସନ୍ ଫୋର୍ସ (RAF) ମଧ୍ୟ ମୁତୟନ ରହିଛି। ମସଜିଦକୁ କେନ୍ଦ୍ର କରି ପ୍ରାୟ ୫୦୦ ମିଟର ପରିଧିରେ ବ୍ୟାରିକେଡିଂ କରାଯାଇ ଯାତାୟାତ ଉପରେ କଟକଣା ଲଗାଯାଇଛି।
ଅବଦାଲପୁରର କଠାଲ ଛକ ଅଞ୍ଚଳରେ ରାସ୍ତା ପ୍ରଶସ୍ତୀକରଣ କାମ ଚାଲିଥିବା ବେଳେ ଏହି ବିବାଦ ଉପୁଜିଛି। ଉପଲବ୍ଧ ରିପୋର୍ଟ ଅନୁସାରେ, ରାସ୍ତା ପ୍ରଶସ୍ତୀକରଣ ଯୋଜନାରେ ଏକାଧିକ ଧାର୍ମିକ ସ୍ଥଳୀ ପ୍ରଭାବିତ ହେଉଛି ଏବଂ କିଛି ସ୍ଥଳୀ ସମ୍ପର୍କରେ ସ୍ଥାନୀୟ ସ୍ତରରେ ସମାଧାନ ହୋଇଥିବା କୁହାଯାଇଛି। ଶାହି ମସଜିଦର ଅଂଶକୁ ନେଇ ତଥାପି ବିବାଦ ଜାରି ରହିଛି। ଏହି ଘଟଣା ସମ୍ପର୍କିତ ମାମଲାରେ ମଧ୍ୟପ୍ରଦେଶ ହାଇକୋର୍ଟରେ ଶୁଣାଣି ଚାଲିଥିବା ରିପୋର୍ଟ ମିଳିଛି। ଏବେ ପ୍ରଶାସନ ଓ ପୋଲିସ ପକ୍ଷରୁ ଅଞ୍ଚଳରେ ଆଇନଶୃଙ୍ଖଳା ପରିସ୍ଥିତି ଉପରେ କଡ଼ା ନଜର ରଖାଯାଇଛି।
Leave a Reply