ଅକ୍ଷର ବ୍ୟୁରୋ: କଟକ ସହରର ବାଦାମବାଡ଼ି ଥାନା ଅନ୍ତର୍ଗତ ମଲାଚଣ୍ଡିଆ ଛକରେ ଘଟିଛି ଏକ ଭୟଙ୍କର ସଡ଼କ ଦୁର୍ଘଟଣା। ୧୮ ନମ୍ବର ରୁଟ୍ରେ ଚଳାଚଳ କରୁଥିବା ‘ଆମ ବସ୍’ ଏକ ବାଇକ୍କୁ ଧକ୍କା ଦେବା ପରେ ବାଇକ୍ ସହ ଆରୋହୀଙ୍କୁ ପ୍ରାୟ ୫୦ ଫୁଟ୍ ପର୍ଯ୍ୟନ୍ତ ଘୋଷାଡ଼ି ନେଇଥିବା ଅଭିଯୋଗ ହୋଇଛି। ଗୁରୁତର ଆହତ ବାଇକ୍ ଆରୋହୀଙ୍କୁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଥିବା ବେଳେ ଦୁର୍ଘଟଣା ପରେ ବସ୍ ଚାଳକ ଘଟଣାସ୍ଥଳରୁ ଫେରାର ହୋଇଯାଇଛନ୍ତି।
ସୂଚନା ଅନୁସାରେ, ‘ଆମ ବସ୍’ ନେତାଜୀ ବସ୍ ଟର୍ମିନାଲ ଭିତରକୁ ପ୍ରବେଶ କରୁଥିବା ସମୟରେ ବାମ ପାର୍ଶ୍ୱରେ ଯାଉଥିବା ଏକ ବାଇକ୍କୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ବାଇକ୍ ଏବଂ ଆରୋହୀ ବସ୍ ତଳେ ଫସିଯାଇଥିଲେ ଏବଂ ବସ୍ ସେମାନଙ୍କୁ ପ୍ରାୟ ୫୦ ଫୁଟ୍ ପର୍ଯ୍ୟନ୍ତ ଘୋଷାଡ଼ି ନେଇଥିଲା।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଦୁର୍ଘଟଣାର ଭୟାବହ ଦୃଶ୍ୟ ଦେଖି ଜଣେ ବ୍ୟକ୍ତି ଘଟଣାସ୍ଥଳରେ ବେହୋସ ହୋଇଯାଇଥିଲେ। ଏହି ସମୟରେ ବସ୍ ତଳେ ଆହତ ଅବସ୍ଥାରେ ଫସି ରହିଥିବା ବାଇକ୍ ଆରୋହୀଙ୍କୁ ବଞ୍ଚାଇବା ପାଇଁ ସ୍ଥାନୀୟ ଲୋକମାନେ ତୁରନ୍ତ ଆଗକୁ ଆସିଥିଲେ। କ୍ରେନ୍ କିମ୍ବା ଅନ୍ୟ ଯନ୍ତ୍ରପାତିକୁ ଅପେକ୍ଷା ନକରି ଶତାଧିକ ସ୍ଥାନୀୟ ବାସିନ୍ଦା ମିଳିତ ଭାବେ ବସ୍କୁ ଟେକି ଆହତଙ୍କୁ ଉଦ୍ଧାର କରିଥିଲେ।
ଖବର ପାଇ ବାଦାମବାଡ଼ି ଥାନା ପୁଲିସ ଘଟଣାସ୍ଥଳରେ ପହଞ୍ଚି ଆହତଙ୍କୁ ତୁରନ୍ତ ଚିକିତ୍ସା ପାଇଁ ଏସ୍ସିବି ମେଡିକାଲ କଲେଜ ଓ ହସ୍ପିଟାଲକୁ ପଠାଇଥିଲେ। ଅନ୍ୟପଟେ, ଦୁର୍ଘଟଣା ପରେ ବସ୍ ଚାଳକ ଫେରାର ହୋଇଯାଇଥିବାରୁ ପୁଲିସ ତାଙ୍କୁ ଧରିବା ପାଇଁ ତଦନ୍ତ ଆରମ୍ଭ କରିଛି। ଏହି ଦୁର୍ଘଟଣା ପୁଣିଥରେ ସହରରେ ସାର୍ବଜନିକ ପରିବହନର ସୁରକ୍ଷା, ଯାନଚାଳନାରେ ସତର୍କତା ଏବଂ ଦୁର୍ଘଟଣା ପରେ ଚାଳକଙ୍କ ଦାୟିତ୍ୱବୋଧକୁ ନେଇ ପ୍ରଶ୍ନ ଉଠାଇଛି। ପୁଲିସ ଘଟଣାର ସମସ୍ତ ଦିଗକୁ ନେଇ ତଦନ୍ତ ଜାରି ରଖିଛି।
Leave a Reply