ଅକ୍ଷର ବ୍ୟୁରୋ: ବିବାହ ଉତ୍ସବର ଖୁସି ମୁହୂର୍ତ୍ତରେ ଘଟିଛି ଏକ ହୃଦୟବିଦାରକ ଅଘଟଣ। ଯାଜପୁର ଜିଲ୍ଲା ବଡ଼ଚଣା ମେଡିକାଲ ଛକ ନିକଟରେ ବରଯାତ୍ରୀ ଦଳରେ ସାମିଲ ଜଣେ ଯୁବକ ବସ୍ ଧକ୍କାରେ ପ୍ରାଣ ହରାଇଛନ୍ତି। ଏହି ଦୁର୍ଘଟଣା ପରେ ବିବାହ ଉତ୍ସବର ଖୁସି ମୁହୂର୍ତ୍ତ ଶୋକରେ ପରିଣତ ହୋଇଛି।
ସୂଚନା ଅନୁଯାୟୀ, କଟକରୁ ଏକ ବରଯାତ୍ରୀ ଦଳ ରୋଷଣୀ ସହ ବଡ଼ଚଣା ନିକଟସ୍ଥ ଏକ ମଣ୍ଡପକୁ ଯାଉଥିଲେ। ସେହି ସମୟରେ ରାସ୍ତା ଦେଇ ଯାଉଥିବା ଏକ ବସ୍ ସମ୍ମୁଖକୁ ହଠାତ୍ ବରଯାତ୍ରୀ ଦଳର ଜଣେ ଯୁବକ ନାଚି ନାଚି ଚାଲିଯାଇଥିଲେ। ଫଳରେ ବସ୍ଟି ଯୁବକଙ୍କୁ ଧକ୍କା ଦେଇ ମାଡ଼ି ଯାଇଥିଲା। ଏହି ଦୁର୍ଘଟଣାରେ ଘଟଣାସ୍ଥଳରେ ହିଁ ଯୁବକଙ୍କ ମୃତ୍ୟୁ ଘଟିଥିଲା। ତେବେ ମୃତକଙ୍କ ପରିଚୟ ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ।
ଖବର ପାଇ ବଡ଼ଚଣା ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିଛି। ଦୁର୍ଘଟଣା ଘଟାଇଥିବା ବସ୍କୁ ଅଟକ ରଖି ପୁଲିସ ଘଟଣାର କାରଣ ନେଇ ଅଧିକ ତଦନ୍ତ ଆରମ୍ଭ କରିଛି। ଏହି ଦୁଃଖଦ ଘଟଣା ପରେ ବରଯାତ୍ରୀ ଦଳ ଓ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ପୁଲିସ ମୃତକଙ୍କ ପରିଚୟ ଜାଣିବା ସହ ଦୁର୍ଘଟଣାର ସମସ୍ତ ପରିସ୍ଥିତିର ତଦନ୍ତ କରୁଛି।
Leave a Reply