ଭୁବନେଶ୍ୱର: ଆଜି ଦିଲ୍ଲୀ ଗସ୍ତରେ ଯିବେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ସନ୍ଧ୍ୟା ୬ଟାରେ ଦୁଇ ଦିନିଆ ଗସ୍ତରେ ରାଜଧାନୀ ଦିଲ୍ଲୀ ଅଭିମୁଖେ ବାହାରିବେ ମୁଖ୍ୟମନ୍ତ୍ରୀ। ତେବେ ଏହି ଗସ୍ତ କେବଳ ଏକ ସାଧାରଣ ଗସ୍ତ ନୁହେଁ। ଓଡ଼ିଶାର ଶକ୍ତି କ୍ଷେତ୍ରରେ ନୂଆ ନିବେଶ ଆଣିବା ସହ ରାଜ୍ୟର ବନ୍ୟା ପରିସ୍ଥିତି ଓ କେନ୍ଦ୍ରୀୟ ସହାୟତା ପ୍ରସଙ୍ଗ ଏହି ଗସ୍ତର ପ୍ରମୁଖ ଏଜେଣ୍ଡା ରହିଛି।
ଗସ୍ତର ଦ୍ୱିତୀୟ ଦିନ ଅର୍ଥାତ୍ ଆସନ୍ତାକାଲି ମୁଖ୍ୟମନ୍ତ୍ରୀ ଭାରତ ରିନ୍ୟୁଏବଲ୍ ଏନର୍ଜି ସମିଟ୍ରେ ଯୋଗଦେବେ। ଏହି ସମ୍ମିଳନୀରେ ନବୀକରଣୀୟ ଶକ୍ତି ବା ଅକ୍ଷୟ ଶକ୍ତି କ୍ଷେତ୍ରରେ ନିବେଶ ଏବଂ ଓଡ଼ିଶାରେ ନୂଆ ପ୍ରକଳ୍ପ ସ୍ଥାପନକୁ ନେଇ ବିଭିନ୍ନ ସଂସ୍ଥା ସହ ଏମ୍ଓୟୁ ସ୍ୱାକ୍ଷର ହେବାର କାର୍ଯ୍ୟକ୍ରମ ରହିଛି। ଏହି କାର୍ଯ୍ୟକ୍ରମରେ ଉପମୁଖ୍ୟମନ୍ତ୍ରୀ ତଥା ଶକ୍ତି ମନ୍ତ୍ରୀ କନକ ବର୍ଦ୍ଧନ ସିଂହଦେଓ ମଧ୍ୟ ଉପସ୍ଥିତ ରହିବେ।
ସୌରଶକ୍ତି, ପବନ ଶକ୍ତି ଏବଂ ଅନ୍ୟାନ୍ୟ ପ୍ରାକୃତିକ ଉତ୍ସରୁ ମିଳୁଥିବା ଶକ୍ତିକୁ ଅକ୍ଷୟ ଶକ୍ତି କୁହାଯାଏ। ଏହି କ୍ଷେତ୍ରରେ ନିବେଶ ବୃଦ୍ଧି ହେଲେ ପାରମ୍ପରିକ ଇନ୍ଧନ ଉପରେ ନିର୍ଭରଶୀଳତା କମିବା ସହ ନୂଆ ଶିଳ୍ପ ପ୍ରତିଷ୍ଠା ଓ ନିଯୁକ୍ତି ସୁଯୋଗ ସୃଷ୍ଟି ହୋଇପାରିବ। ଏଥିସହ ରାଜ୍ୟର ସବୁଜ ଶକ୍ତି ଉତ୍ପାଦନ ବୃଦ୍ଧି ଏବଂ ଭବିଷ୍ୟତର ଶକ୍ତି ଆବଶ୍ୟକତା ପୂରଣ ଦିଗରେ ଏହି ସମ୍ମିଳନୀ ଗୁରୁତ୍ୱ ବହନ କରୁଛି।
ଅନ୍ୟପଟେ, ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତର ଆଉ ଏକ ପ୍ରମୁଖ ଏଜେଣ୍ଡା ହେଉଛି ରାଜ୍ୟର ବନ୍ୟା ପରିସ୍ଥିତି। ବନ୍ୟା ଯୋଗୁଁ ପ୍ରଭାବିତ ଅଞ୍ଚଳ, ହୋଇଥିବା କ୍ଷୟକ୍ଷତି ଏବଂ ଚାଲିଥିବା ରିଲିଫ୍ କାର୍ଯ୍ୟକୁ ନେଇ କେନ୍ଦ୍ରୀୟ ନେତୃତ୍ୱଙ୍କ ସହ ଆଲୋଚନା ହୋଇପାରେ। ବିଶେଷକରି ବନ୍ୟା ପରବର୍ତ୍ତୀ ପୁନରୁଦ୍ଧାର, ପ୍ରଭାବିତ ଅଞ୍ଚଳରେ ଭିତ୍ତିଭୂମିର ପୁନଃନିର୍ମାଣ ଏବଂ ଆବଶ୍ୟକ କେନ୍ଦ୍ରୀୟ ସହାୟତା ପ୍ରସଙ୍ଗ ଆଲୋଚନାରେ ସ୍ଥାନ ପାଇପାରେ। ତେବେ ମୁଖ୍ୟମନ୍ତ୍ରୀଙ୍କ ଏହି ଦୁଇ ଦିନିଆ ଗସ୍ତ ଓଡ଼ିଶାର ଶକ୍ତି କ୍ଷେତ୍ରରେ ନୂଆ ନିବେଶର ସମ୍ଭାବନା ସୃଷ୍ଟି କରିବା ସହ ବନ୍ୟା ପ୍ରଭାବିତ ରାଜ୍ୟ ପାଇଁ କେନ୍ଦ୍ରୀୟ ସହାୟତା ହାସଲ ଦିଗରେ କେତେ ଫଳପ୍ରଦ ହେଉଛି, ତାହା ଉପରେ ରହିବ ସମସ୍ତଙ୍କ ନଜର।
Leave a Reply